ABŞ ordusu Hörmüz boğazından milyonlarla barel neftin gizli şəkildə daşınmasını təşkil edib.

Axios xəbər verir ki, boğazın cənub kanalından hər gün 15-20 tanker keçərək, Yaxın Şərqdən müharibədən əvvəlki səviyyənin yarısı qədər - təxminən 10 milyon barel neft ixrac edir.

"Artıq iki aydır ki, Cənubi Hörmüzü nəzarətdə saxlayırıq. İslam İnqilabı Keşikçiləri Korpusu problem yarada bilər, amma onlar boğaza nəzarət etmirlər. Biz nəzarət edirik", - deyə Axios əməliyyatla tanış olan mənbəyə istinadən bildirib.

ABŞ hərbi mütəxəssislərindən ibarət qrup əməliyyatı Vaşinqtonun Yaxın Şərq tərəfdaşları ilə əlaqələndirir və Hörmüz boğazından keçməsi planlaşdırılan gəmilərin gündəlik siyahısını tərtib edir. ABŞ Hərbi Hava Qüvvələrinin qırıcı təyyarələrinin müşayiəti ilə bu gəmilər hər gecə neft yükləyir və boşaldır, vaxtaşırı yoxlama məntəqələrinə hesabat verirlər.

Gəmilər Fars körfəzinə daxil olur, BƏƏ, Bəhreyn və Küveytdə neft götürür və sonra geri qayıdırlar. Onların hərəkətləri regional müttəfiqlərlə əlaqələndirilir: tankerlər boğazdan müəyyən olunmuş vaxtlarda böyük qruplar şəklində keçir və yoxlama məntəqələrindən keçdiklərini bildirirlər.

Axios-a görə, əməliyyat İran radarlarına və dəniz nəzarət sistemlərinə zərbələrdən sonra uğurla təşkil edilib. İran hazırda boğazın cənub hissəsində gəmilərin hərəkətini demək olar ki, görə bilmir və onlara kor-koranə hücum etməyə çalışır. Onun atdığl raket və dronları isə ABŞ hərbi təyyarələri vurur.

Göndərmə həcmləri müharibədən əvvəlki səviyyələrdən aşağı olsa da, onlar artıq qlobal neft tədarükünə əhəmiyyətli dərəcədə təsir göstərir.