İran prezidenti Məsud Pezeşkian istefası ilə bağlı yayılan xəbərləri təkzib edərək, bu iddiaları “tamamilə yalan və uydurma” adlandırıb.

O, bu barədə dövlət televiziyasında yayımlanacaq müsahibəsinin anonsunda deyib.

Pezeşkian açıqlamasında silahlı qüvvələrlə sıx əməkdaşlıq şəraitində işlədiklərini vurğulayıb:

“Biz silahlı qüvvələrlə tam koordinasiyalı şəkildə fəaliyyət göstəririk. Mən istefa verməyəcəyəm və mövqeyimdə sonadək dayanacağam. Əgər istefa versəm, bu barədə rəsmi şəkildə özüm elan edəcəyəm”, - deyə o vurğulayıb.

Prezidentin bu açıqlaması yüksəkrütbəli şiə din xadimi Məhəmməd-Baqir Xərrazinin iddialarından sonra səslənib. Din xadimi daha əvvəl Pezeşkianın “28 dəfə” istefa verməklə hədələdiyini, lakin növbəti müraciətinin qəbul olunacağı ilə bağlı xəbərdarlıq aldıqdan sonra bu cəhdləri dayandırdığını iddia edib.