“10 ildir ki, Bakının bir addımlığında işıq üzünə həsrətik

Həftədə 4-5 dəfə işıqlarımız sönür. Söndüyü bəs deyil, yananda da vurub elektrik avadanlıqlarını sıradan çıxarır. 2-3 min manat xərc çəkib kombi çəkdirənlər var ki, heç onu işlətmək qismət olmayıb, soyuducusu, televizoru, kondisioneri sıradan çıxanları demirəm”.
Bunu Publika.az-a Xırdalan şəhəri Mehdi Hüseyn küçəsində yaşayan İlqar Atayev bildirib.
Həmin ərazidə yerləşən 54 nömrəli transformatorun 10 ildən çoxdur ki, yenilənmədiyini deyən şikayətçinin sözlərinə görə, ərazidə 100-lərlə ev bu problemdən əziyyət çəkir. Hər dəfə qırılan naqillər bərkidilsə də, bu, ərazinin elektrik problemini yalnız qısa müddətə həll edir.
“Oktyabrın 24-ü axşamdan şəbəkədə həm 0, həm də fazada cərəyan var idi. Bütün soyuducuları, kombiləri, elektrik avadanlıqlarını yandırdı. Noyabrın 7-si gecədən səhərə kimi işıq söndü, yananda kondisioneri sıradan çıxardı. İşıq sönən kimi ərazidə bir mühəndis var, onu çağırırıq, gəlir qırılanı yamayıb gedir. Şənbə-bazar günlərinə düşəndə isə, ümumiyyətlə, ərazi elektrik şəbəkədə heç kimi tapmaq olmur”, – deyə şikayətçi bildirdi.
Problemlə bağlı “Azərişıq” ASC-nin mətbuat xidməti ilə əlaqə saxladıq. Qurumun mətbuat xidmətinin rəhbəri Tanrıverdi Mustafayevin Publika.az-a bildirdiyinə görə, vəziyyətlə bağlı ölçü götürüləcək:
“Xırdalan Elektrik Şəbəkənin “Azərişıq” ASC-yə verilməsinin cəmi 9 ayı tamam olub. Mən Xırdalan Elektrik Şəbəkənin rəisinə vəziyyəti məruzə etdim. O, ərazi ilə tanış olacaq, ehtiyac olarsa, transformator dəyişdiriləcək və ya problemin aradan qaldırılması üçün müvafiq işlər görüləcək”.