Bir nəfərin ölümünə, bir nəfərin isə ağır yaralanmasına səbəb olan qəzadan sonra nəhayət ki, tikinti gedən ərazidə təhlükəsizlik tədbirləri görülüb.

Musavat.com xəbər verir ki, Səbail rayonu, Parlament prospekti 9 ünvanında davam edən tikintinin ətrafında qəza baş verəndən bir neçə gün sonra təhlükəsizlik tədbirləri görülüb. Tikilinin ətrafında piyadaların hərəkəti üçün nəzərdə tutulmuş yolun üstü xüsusi avadanlıqlarla bağlanıb.
Tikilinin yanında olan piyada keçidinin belə üstü bağlanıb. Görülən bu tədbirlər yəqin ki, bundan sonra tikilinin yuxarı mərtəbələrindən düşəcək hər hansı bir tikinti materialının piyadalara xəsarət yetirməsinə imkan verməyəcək.
Onu da qeyd edək ki, tikinti işlərinə bir neçə ay əvvəl başlanılıb. Artıq 3 mərtəbəsi inşa edilən tikilidə qəza baş verənə qədər heç bir təhlükəsizlik tədbirləri görülməmişdi. Və bu hal Bakıdakı digər tikinti gedən ərazilərdə də müşahidə olunur. Təhlükəsizlik tədbirlərinə əməl edilməməsi səbəbindən baş verən qəzalar dəfələrlə insan itkisinə səbəb olub.
Xatırladaq ki, qeyd etdiyimiz ünvanda səki ilə hərəkət edən iki qadının üstünə dəmir borular düşmüşdü. Nəticədə 1941-ci təvəllüdlü Ruhəngiz Talıbova aldığı xəsarətdən hadisə yerindəcə keçinmişdi. Digər piyada isə ağır xəsarətlərlə xəstəxanaya yerləşdirilmişdi.

Qeyd edək ki, adı çəkilən ünvanda 20 nömrəli məktəbin inşası aparılır.