28 aprel 2015-ci il tarixdə Azərbaycan Kommunist Partiyasının (Züqanovçular) fəalları Bakının tanınmış fəhlə və həmkarlar fəalı, bolşevik Xanlar Səfərəliyevin (1885 - 1907) Bakı şəhərinin cənub kənarında yerləşən Bibi Heybət qəsəbəsindəki qəbri və abidəsini ziyarət etdilər. Onlar, Azərbaycanda Sovet hakimiyyətinin qurulmasının 95-ci ildönümü və X. Səfərəliyevin anadan olmasının 130-cu ildönümü münasibəti ilə onun xatirəsini yad etdilər.
AKP (Züqanovçular) Mərkəzi Komitəsinin sədri Gülnisə Məhsimova qeyd etdi ki, 27-28 aprel 1920-ci il tarixdə Azərbaycanın tarixində böyük bir hadisə baş verib. Xalq üsyanı "Müsavat" partiyasının mürtəce və imperializmə söykənən rejiminə son qoymuş və 1918-ci ilin yayında devrilmiş Sovet hakimiyyətini bərpa etmişdir. Sovet hakimiyyətinin bərpası Azərbaycan Sovet Sosialist Respublikasının təşkilinə və Azərbaycanda iqtisadiyyatın, mədəniyyətin və sosial sahənin görünməmiş inkişafına gətirib çıxarmışdır. Bununla əlaqədar olaraq, G. Məhsimova kommunistləri və bütün Azərbaycan xalqını respublikanın tarixində yer almış bu əlamətdar hadisə münasibəti ilə təbrik etdi.
G. Məhsimova həmçinin qısa, amma şanlı bir həyat yaşamış fəhlə və həmkarlar fəalı X. Səfərəliyevin inqilabçı yolundan danışdı. O, Bakının neft mədənlərində fəhlə və həmkarlar hərəkatına başçılıq etmiş və 1907-ci il sentyabrın 19-dan 20-nə keçən gecə mədən sahiblərinin göndərdiyi muzdlu qatil tərəfindən ölümcül yaralanmışdır.
X. Səfərəliyevin qətli Bakı fəhlələrinin hiddətinə və çoxminlik nümayiş və tətillərinə səbəb olmuşdur. Həmkarlar fəalının Bibi Heybətdə torpağa tapşırılması mərasimində o zaman Bakıda olmuş İ.V. Stalin çıxış etmişdir.
Züqanovçu kommunistlər fəhlə fəalının xatirəsini bir dəqiqəlik sükutla yad edib onun qəbrinin üstünə tər çiçəklər qoydular. G. Məhsimovanın rəhbərlik etdiyi kommunistlər hər il X. Səfərəliyevin qəbri və abidəsinin önünə toplaşırlar. Bununla onlar, Azərbaycanda Sovet hakimiyyətinin qurulmasının ildönümünü qeyd edirlər.

Azərbaycan Mütərəqqi Sosialist Partiyasının mətbuat xidmətindən





http://left-az.livejournal.com