Azərbaycan Kommunist Partiyasının (Züqanovçular) fəalları 25 aprel 2015-ci ildə V.İ. Leninin xatirəsini onun Azərbaycanın Qəbələ rayonu Qəmərvan kəndindəki heykəlinin yanında yad ediblər. Azərbaycanın şimalında, Böyük Qafqaz dağlarının mənzərəli guşəsində yerləşən bu heykəl V.İ. Leninin Azərbaycanda bu günə qədər qalmış yeganə abidəsidir.

AKP fəalları dünya kommunist hərəkatının rəhbəri, siyasətçi və mütəfəkkir, Böyük Oktyabr sosialist inqilabının təşkilatçısı və ideoloqu, Sovet İttifaqının banisi və ilk rəhbərinin abidəsinə tər çiçəklər qoyublar. Bununla onlar, V.İ. Leninin anadan olmasının 145-ci ildönümünü qeyd ediblər.

AKP (Züqanovçular) Mərkəzi Komitəsinin sədri Gülnisə Məhsimova toplaşanların qarşısında çıxış edib. O, böyük siyasi xadimin xatirəsini qoruyub saxlamağın zəruri olduğunu bildirib və qeyd edib ki, V.İ. Lenin sosial ədalətə əsaslanan və kapitalizmə alternativ olan sosializm yolunu bəşəriyyətə göstərib. Bununla əlaqədar olaraq, G. Məhsimova qeyd edib ki, onun partiyasının fəalları V.İ. Leninin Azərbaycanda yeganə qalmış abidəsini qoruyub saxlamağa israrlıdır.

Azərbaycan Mütərəqqi Sosialist Partiyasının mətbuat xidməti




http://left-az.livejournal.com