7-ci Etnosport Mədəniyyət Festivalı İstanbulda start götürüb. Dünya Etnospor Birliyinin təşkilatçılığı ilə baş tutan festival İstanbul Atatürk Hava Limanında 4 gün davam edəcək. 35 ölkənin qatıldığı festivalda ənənəvi idman növləri və oyunlar, ənənəvi sənətlər, mətbəx nümunələri və səhnə sənətləri kimi müxtəlif sahələrdə tədbirlər keçiriləcək.
Festivalın açılış mərasimində Türkiyənin Gənclik və İdman naziri Osman Aşkın Bak, İstanbul Valisi Davut Gül, Dünya Etnospor Birliyinin prezidenti Bilal Ərdoğan, Azərbaycan Silahlı Qüvvələrinin general-polkovniki, Azərbaycan Respublikası Dövlət Sərhəd Xidmətinin rəisi və Azərbaycan Respublikası Atçılıq Federasiyasının prezidenti Elçin Quliyev, eləcə də Azərbaycanı təmsil edən təşkilat və media nümayəndələri ilə yanaşı, bir çox ölkədən rəsmi nümayəndələr iştirak ediblər. Protokol üzvləri Han Çadırı önündə təşkil olunan mərasimdə lent kəsərək festivalın
rəsmi açılışını həyata keçiriblər.



Azərbaycan Respublikası Atçılıq Federasiyasının təşkilatçılığı ilə 130 nəfərlik nümayəndə heyəti və 20 Qarabağ atı ilə ölkəmiz festivala qatılıb.
Türk dünyasının milli-mənəvi dəyərlərini özündə birləşdirən və minlərlə ziyarətçini qəbul edən bu mötəbər tədbirdə “Zəfər” şou kompozisiyasında Qarabağ atlarının özünəməxsus çıxışı, incə Azərbaycan rəqsləri, ecazkar milli musiqimiz və 2025-ci il üçün hazırlanmış yeni orkestrin ifaları təqdim olunub.
Milli musiqi alətlərində səsləndirilən “Yallı”, maestro Niyazinin “Qaytağı”sı, Emin Sabitoğlunun “İncə bellim”i, Müslüm Maqomayevin “Azərbaycan” mahnısı, “Sərhədçi” rəqs ansamblının coşqulu çıxışları və Dövlət Sərhəd Xidmətinin süvarilər dəstəsinin Qarabağ atları üzərində sərgilədiyi qeyri-adi performans festival iştirakçılarının böyük marağına səbəb olub. Festival çərçivəsində Dünya Etnospor Birliyinin prezidenti Bilal Ərdoğan və Azərbaycan Respublikası Dövlət Sərhəd Xidmətinin rəisi, eyni zamanda Azərbaycan Respublikası Atçılıq Federasiyasının prezidenti Elçin Quliyev arasında görüş baş tutub və tədbirə dəvətə görə Türkiyə tərəfinə minnətdarlıq ifadə olunub.
Bilal Ərdoğan Azərbaycan nümayəndə heyətinin festivaldakı möhtəşəm çıxışından məmnunluğunu bildirərək, milli sərvətimiz olan Qarabağ atlarının yenidən izləyiciləri valeh etdiyini qeyd edib.

Festivala dəvət edilən “Əbədi Birlik” Gənclər İctimai Birliyinin sədri Şahin Əliyev saytımıza açıqlamasında bildirib:

“Türk dünyasının milli-mədəni irsini təbliğ edən bu cür beynəlxalq festivallar birliyin, həmrəyliyin və ortaq dəyərlərin güclənməsi baxımından əvəzsiz əhəmiyyət daşıyır. Azərbaycan nümayəndə heyətinin Qarabağ atları ilə sərgilədiyi yüksək səviyyəli çıxış, milli musiqimizin və rəqslərimizin təqdimatı təkcə mədəniyyətimizin zənginliyini deyil, eyni zamanda azərbaycanlı gənclərin bu dəyərlərə olan bağlılığını da nümayiş etdirdi. Əbədi Birlik olaraq biz bu cür tədbirləri milli kimliyimizin qorunması və gələcək nəsillərə ötürülməsi baxımından olduqca önəmli hesab edirik. Tədbirdə iştirak etmək və Türk dünyasının ortaq ruhunu yaşamaq bizim üçün böyük fəxr və məsuliyyətdir. Festival çərçivəsində Dünya Etnospor Birliyinin prezidenti Bilal Ərdoğan, Dövlət Sərhəd Xidmətinin rəisi Elçin Quliyev, Türkiyənin Gənclər və İdman naziri Osman Aşkın Bak və Ədalət və İnkişaf Partiyasının sədr müavini və Türk Dövlətləri ilə əlaqələr rəhbəri Kürşad Zorlu bəylərlə ayaqüstü də olsa fikir mübadiləsi aparmaq fürsəti qazandım. Bu, mənim üçün olduqca dəyərli və yadda qalan bir an oldu.” – deyə Şahin Əliyev vurğulayıb.
Qeyd edək ki, Azərbaycan nümayəndə heyətinin çıxışları 25 may tarixinədək davam edəcək