Uzun bığları, maraqlı siması onu digər həmyaşıdlarından fərqləndirir. Zarafatçıl, nurani qoca artıq 50 ildən artıqdı uzun bığ saxlayır. Hər səhər xanımı ilə birgə ona həvəslə qulluq edir. 75 yaşlı Sayad Kazımov Tovuzun Əlimərdanlı kəndində yaşayır. Gənc yaşlarından dəmirçi, hərbi xidmətdən sonra isə həm bığ buraxıb, həm də yeni peşəyə sahib olub. Onu rayonda hər kəs ən uzun bığlı usta kimi tanıyır. Avtomobillərin müxtəlif detallarını, elektrik avadanlıqlarını yenidən həyata qaytaran usta yaşının bu çağında da işdən yorulmur.

Ata, baba, əmi uzun eşmə bığlı olduğundan Sayad Kazımov da onlardan geri qalmayacağına söz verib. Müsahibim deyir hər il bığının ucundan bir xeyli kəsməsə daha fərqli görkəmi olar. Maraqlısı odur ailə üzvlərindən kimsə ona narazılıq etmir. Orta məktəbdə sevib ailə qurduğu xanımı isə həyat yoldaşı ilə fəxr etdiyini deyir.

4 övlad, 10-a yaxın nəvə-nəticə sahibi olan Əlimərdanlı sakini, bundan sonra da uzun bığları ilə diqqət mərkəzində qalacağını deyir. Məşhur usta qida qəbul edərkən hər hansı çətinlik yaranmasa da, bəzən iş vaxtı uzun bığları ona mane ola bilir.

http://kepeztv.az