İsveçdə Kent Lindvall adlı şəxsin "Mirror Cub" - "Güzgülü kub" oteli qeyri - adi dizaynı ilə hər kəsin böyük marağına səbəb olur. Bu otel əsl sənət əsərini xatırladır. Otel xarici güzgülərlə elə əhatə olunub ki, insan ilk baxışdan onun gözə görünməz olduğunu düşünür. Meşənin ortasında, ağaclarla əhatə olunmuş otelə gələn qonaqların sayı hesabı yoxdur. Bir neçə kabinetdən ibarət oteldə bir gün istirahət etmək istəyənlər isə nə az, nə çox 500 avrolarından keçməlidirlər.
Müştəriləri cəlb etmək üçün ağıla gəlməyən məkanlarda da otel quranlar tapılıb. Məsələn, ingilislər Oksford şəhərində yerləşən keçmiş həbsxananı otelə çeviriblər. Əvvəllər çoxları bu sevdanın baş tutacağına inanmasa da "Malmaison Oxford" oteli indi minlərlə insanın xidmətində durur. Müxtəlif kateqoriyalı 94 nömrəsi olan oteldə qonaqlara yüksək səviyyəli xidmət göstərilir. Burada bir gecənin qiyməti 233 dollardır.
Avstaliyalı iş adamları isə nə qədər qəribə olsa da kanalizasiya borularının içində otel yaradıblar. Açıq havada yerləşən "Das Park Hotel"də otaqların diametri 2, uzunluğu isə 2,5 metrdir. Boruların içində ikinəfərlik döşək, gecə lapması və televizor var. Burada bir gecə qalmaq 40 dollara başa gəlir.
Florida ştatının sualtı Ki-Largo parkında yerləşən otel də qeyri-adi dizaynı ilə diqqət çəkir. Oteli maraqlı edən isə buranın suyun altında yerləşməsidir. Otel torpaq səthindən 6 metr dərinlikdə yerləşir. Qonaqların rahatlığı üçün hər cür şəraiti olan oteldə məşq zalları və spa-mərkəzinə belə rast gəlmək mümkündür. Ən maraqlısı isə təbii ki, pəncərədən müxtəlif növ balıqları izləməkdir.

Atv.az