Gəncə şahmatçısı Vüqar Rəsulov bu gün İsraildə startı verilən şəxsi Avropa çempionatında mübarizəyə başlayır. 24 yaşlı iti zəka sahibi Azərbaycanı yarışda təmsil edən 5 şahmatçıdan biridir. Qitə birinciliyi bu ilin sentyabrında Bakıda keçiriləcək Dünya Kubokuna vəsiqə verdiyindən yarış komanda yoldaşları kimi Rəsulov üçün də xüsusi əhəmiyyət daşıyır. 255 şahmatçının çıxış edəcəyi turnir 11 turdan ibarət olacaq. Vüqar 2009-cu ildən başlayaraq Avropa çempionatında qüvvəsini sınayır. Onun ən yaxşı nəticəsi elə debüt yarışına təsadüf edib. Məşqçi Asif Həsənovun yetirməsi qrossmeyster normasını yerinə yetirməklə, Dünya Kubokuna vəsiqə qazanmağa yaxın olub. İdmançı cari yarışda məqsədinə çatmağı hədəfləyib.

Asif Həsənov- Vüqar Rəsulovun məşqçisi: "Qarşımıza çox ciddi hədəflər qoymuşuq. İlk 23 yer Dünya Kubokuna vəsiqə verir. Ümid edirəm ki, Vüqar bütün bacarığını və biliyini ortaya qoyub məqsədə çatacaq. Açığı bu elə də asan olmayacaq. Amma asan heç nə yoxdur".