Qəsəbənin «Yeni Massiv» adlanan məhəlləsində evləri su basıb, İradə Gülməmmədova isə hər şeyi görməzdən gəlir

Abşeron rayonunun ən böyük yaşayış məntəqələrindən biri olan Saray qəsəbəsində əhali yağış sularından əziyyət çəkir. Daha doğrusu, yağan yağışlardan sonra qəsəbədə Binəqədidəki durum yaşanır. Yəni, insanlar evlərindən çıxıb, başqa bir yerə getmək istəyərlərsə, o zaman taksi deyil, qayıq sifariş etməlidirlər.

Redaksiyamız xəbər verir ki, Saray qəsəbəsinin kanalizasiya xətlərinin bərbad vəziyyət olması səbəbindən yaşanan acınacaqlı duruma isə əl qoyan yoxur. Belə ki, qəsəbənin «Yeni Massiv» kimi tanınan məhəllələrində sonuncu yağan yağışdan sonra evləri sel basıb. Kanalizasiya xətlərinin olmaması səbəbindən yaşanan dəhşətli vəziyyətdən dolayı evlərə xeyli ziyan dəyib.

Sakinlər isə bildirirlər ki, sonuncu yağış Sarayı iflic vəziyyətə salıb. Onlar müraciət etmədikləri instansiya qalmayıb. Lakin nə tədbir görən var, nə də problemi çözən. Saraylılar qeyd edirlər ki, üzləşdikləri problemlərdən dolayı Abşeron İcra Hakimiyyətinə, rayonun Su-Kanal İdarəsinə və yerli bələdiyyəyə müraciətlərinə də cavab verən yoxdur.

Saray qəsəbəsinin sakinləri son ümid yeri olaraq dövlət başçısını görüblər və bu səbəbdən də ona müraciət ediblər. Onlar bildirirlər ki, övladları məktəbə gedə bilmir, valideynləri yağışlı havalarda iş üzünə həsrət qalırlar, çünki evlərindən çıxa bilmirlər. Bu azmış kimi, yağış sularının yaratdığı sel evlərə girərək, onları da sıradan çıxarmaqdadır. «Cənab Prezident, sizdən artıq dərəcədə xahiş edirik ki, Saray qəsəbəsinin mövcud problemlərinin həllini nəzarətinizə götürəsiniz. Bizi Abşeronun rəhbərliyinin ümidinə qoymayın».

Qeyd edək ki, Abşeron rayonuna yeni icra başçısı təyin olunmuş İradə Gülməmmədova problemləri bir kənara buraxıb, özünün güzaranını yaxşılaşdırmağa başı qarışıb. Elə bu səbəbdəndir ki, təkcə Saray qəsəbəsində deyil, Xardılan şəhərinin də problemlərinin həlli havada qalıb. Əhali isə qış aylarında evlərində normal elektrik enerjisi və su görmək istəyir. Hətta bununla əlaqədar İcar Hakimiyyətinin qarşısına yığışaraq, etiraz etmələrinin də faydası olmayıb.

Qarşı tərəfi də dinləməyə hazırıq.