Araşdırmalara görə, xərçəngin yaranmasında yalnız genetik amillər deyil, həyat tərzi və qidalanma vərdişləri də mühüm rol oynayır.

“Mütəxəssislər bildirirlər ki, bir çox insan üçün xərçəng genetik olaraq əvvəlcədən müəyyənləşmiş xəstəlik deyil və düzgün qidalanma ilə risk faktorlarını azaltmaq mümkündür.

Sağlam olmayan qidalanma, həddindən artıq yağ, şəkər və duz istehlakı, eləcə də, bəzi emal olunmuş qidaların tez-tez qəbul edilməsi xərçəng riskini artıran əsas amillər sırasında göstərilir.

Məlumatlara görə, doymuş yağların, xüsusilə marqarin, kərə yağı və həddindən artıq yağlı qidaların çox istifadəsi orqanizmə mənfi təsir göstərə bilər. Qızardılmış yeməklər və “fast-food” məhsulları isə yüksək temperaturda hazırlanma zamanı yaranan bəzi zərərli maddələr səbəbindən risk faktorlarını artıra bilər.

Liflə zəngin qidaların az qəbul edilməsi də diqqətçəkən amillərdən biridir. Xüsusilə tərəvəz, meyvə, paxlalıların kifayət qədər istehlak edilməməsi həzm sistemi, o cümlədən, bağırsaq sağlamlığı üçün mənfi nəticələr yarada bilər. Bundan əlavə, həddindən artıq ağ un, şəkərli məhsullar, süni dadlandırıcılar və duzlu qidaların istifadəsinin də sağlamlıq üçün təhlükə yaratdığı qeyd olunur.

Mütəxəssislər isti qida və içkilərin həddindən artıq qəbul edilməsinin də risk faktorlarından biri ola biləcəyini bildirirlər. Eyni zamanda, pestisid qalıqları, bəzi qida əlavələri və nəzarətsiz istifadə olunan kimyəvi maddələrin uzunmüddətli təsirləri ilə bağlı narahatlıqlar mövcuddur.

Xərçəngdən qorunmada isə balanslı qidalanma əsas amillərdən biri hesab olunur. Təzə tərəvəz və meyvələr, xüsusilə brokoli, kələm, ənginar, alma, armud, qaragilə, zoğal, avokado və göyərtilər kimi antioksidantlarla zəngin qidaların rasionda yer alması tövsiyə edilir.

Sağlam qidalanma ilə yanaşı, fiziki aktivlik, zərərli vərdişlərdən uzaq durmaq və müntəzəm tibbi müayinələr də xərçəng riskinin azaldılmasında mühüm rol oynayır.