Türkiyənin baş naziri Əhməd Davudoğlu Türkiyə və Azərbaycanın yaşanan acı hadisələRə baxmayaraq çox yaxın iki dövlət olduğunu bildirib

Azerinfo.az xəbər verir ki, Davudoğlu Türkiyənin İğdır vilayətində ikən Ağrı dağının ətəyindən bütün Qafqaz xalqına səsləndiyini bildirib.

O çıxışı zamanı 1944-cü ildə 146 azərbaycanlının Boraltan körpüsünü keçərək Türkiyəyə pənah apardığını, amma Türkiyədə iqtidarda olan CHP hökumətinin onları ruslara qaytardığını deyib.

Davudoğlu sözlərinə belə davam edib:

"Kim etdi bunu? Azərbaycan ilə strateji əməkdaşlığı kim qurdu? Əlbətdə ki, Ədalət və İnkişaf Partiyası. Bizim dövrümüzə qədər Türk Dünyası Şurası qurulmamışdı, Azərbaycanla əlaqələr gelişlənməmişdi. Prezidentimizin baş nazir olduğu dövrdə Türkiyə-Azərbaycan əlaqələri ən yüksək səviyyəyə çıxdı. Bizim üçün Naxçıvanla İğdır arasında heç bir fərq yoxdur, Azərbaycan ilə Türkiyə arasında da bir fərq yoxdur. Bəziləri 77 milyonun arasına fitnə soxmağa çalışırlar. Bizim üçün sünni-şiə, türk-kürd ayrı-seçkiliyi yoxdur. Hamımız müsəlmanıq."

Xatırladaq ki, 1944-cü ildə Türkiyəyə sığınan 146 azərbaycanlı o dövrün CHP hökuməti tərəfindən Rusiyaya qaytarılmışdı. Geri qaytarılan azərbaycanlılar sərhədin Rusiya tərəfindəcə edam edilmişdi.

Bundan sonra Davudoğlu Azərbaycan ilə Türkiyə arasındakı viza rejiminə də münasibət bildirib. Davudoğlu bir gün öncə İğdıra gedərək xalqa xitab edərkən Azərbaycan tərəfinin vizaları ləğv etməməsini hökumətinin uğursuzluğu kimi qələmə vermək istəyən Kılıçdaroğluna belə cavab verib:

"Türkiyə olaraq bütün azərbaycanlı qardaşlarımız üçün vizanı ləğv etdik. Azərbaycan da hazırlıqlarını tamamladığı zaman vizaları da, pasportları da ləğv edəcəyik. Bir millət iki dövlət deyə birləşəcəyik. Amma Kılıçdaroğlunun bilmədiyi şeylər var ki, bunlar dövlətlər arası əlaqələrdir. Bu məsələ iki tərəfin də hazır olmasına bağlıdır. Biz Azərbaycana bunu təklif etdik. Hazır olduqları zaman başımızın üzərində yerləri var. Bütün azərbaycanlılar üçün Türkiyə, ana vətəndir."