Türkiyə prezidenti Rəcəb Tayyib Ərdoğan Ermənistanla bağlı mühüm açıqlamalar verib.

Azerinfo.az Avropa.info-ya istinadən xəbər verir ki, səfərdə olduğu Kolumbiyada təşkil olunan “1915: Osmanlı imperatorluğunu ən uzun ili” simpoziumunda çıxış edib.

Ərdoğan Ermənistana uzatdıqları əlin erməni diasporunun da təsiri ilə hər dəfə göydə qaldığını vurğulayaraq Ermənistanın etik qaydaları pozan açıqlamalarıylə növbəti dəfə sülhün yolunu bağladığını söyləyib.

"Əlaqələri düzəltmək və yeni bir səhifə açmaq üçün səy göstərdik. Təəssüf ki, erməni diasporunun da təsiriylə bizim onlara uzatdığımız əlimiz hər dəfə havada qaldı. Bu il, 100-cü ildönümündə biz yenə səmimi şəkildə ermənilərə səslənirik. Gəlin bu məsələni siyasətin sahəsindən çıxaraq, elmə və elm adamlarına həvalə edək."

Ərdoğan erməniləri aprel ayının 24-də Çanaqqala hadisələrinin ildönümü münasibətilə keçiriləcək tədbirə dəvət etdiklərini, amma heç bir müsbət cavab almadıqlarını bir daha tədbir iştirakçılarının nəzərinə çatdırıb.

O bu gün dünya miqyasında baş verən problemlərin kökündə birinci dünya müharibəsinin durduğunu vurğulayaraq məsələnin həllinə nail olmaq üçün mütləq birinci dünya müharibəsini yaxşıca analiz etmək lazım olduğunu bildirib.

"Bu gün bütün dünyanı maraqlandıran bir çox beynəlxalq məsələnin kökündə birinci dünya müharibəsi durur. Fələstin məsələsi, pik nöqtədə olan İraq və Suriya məsələləri, Yəmən, Misir, Şimali Afrika, Qafqaz və Balkanlardakı problemlər təəssüf ki, birinci dünya müharibəsindən sonra ortaya çıxıb."