"Mövlud Evi"nin üzərində kral üçün saray inşa ediləcəyi gözlənilir

Səudiyyə Ərəbistanı kralı Abdullah üçün saray inşa ediləcək. İddialara görə, hazırkindən 5 dəfə böyük olacaq bu saray Məkkədə, Məhəmməd Peyğəmbərin (s.ə.s) doğulduğu yerdə ucadılacaq. Bunun üçün adıçəkilən məkan əvvəlcə mərmərlə qapadılacaq.
Yayılan xəbərdə qeyd edilir ki, 500 illik tarixə malik Osmanlı sütunları da buna görə dağıdılıb.

Saray inşaasının, Məscid-i Haramı genişləndirib daha çox zəvvarın istifadəsinə şərait yaratmağı planlaşdıran amma hal-hazırda yüzlərlə tarixi abidənin və binanın dağıdılmasına səbəb olan yenilənmə layihəsi çərcivəsində olacağı qeyd edilir.
Mərkəzi Londonda yerləşən İslami Miras Araşdırma Fondunun nümayəndəsi İrfan Alavi peyğəmbərin (s.ə.s) doğulduğu yer olduğuna inanılan "Mövlud evi"nin ili sonuna kimi dağıdılacağını gözlədiklərini deyib.

Onun sözlərinə görə, "Mövlud Evi"nin otaqları hazırda yerin altındadır. 1951-ci ildə bu otaqları qorumaq üçün üzərində kitabxana tikilib. Amma ötən il hacıların bu kitabxanaya girişinə icazə verilməyib.

"Məhəmməd peyğəmbərin (s.ə.s) doğulduğu yer beton və mərmərin altında qalıb tamamilə unudulmaq təhlükəsi ilə qarşı-qarşıyadır. Həcc ziyarəti bitdiyi üçün 24 saat davam edən inşaat işləri yenidən başlayıb. Məscidin bir tərəfində genişləndirmə işləri bitib. Hazırkı saraydan 5 dəfə böyük olacaq yeni kral sarayı bir dağın kənarında olacaq və məscidə yuxarıdan baxa biləcək. Dekabra qədər kitabxana dağıdılacaq və yeraltı otaqların üzərində inşaat başlayacaq. Biz təklif edirik ki, qalan otaqları qoruma altına alaq".

"Independent" qəzeti kral Abdullahın "Məscid-i Haram"a tikdirməyi planlaşdırdığı sarayın planını gördüyünü və onun hazırkı "Mövlud Evi"nin də olduğu bölgəni tutduğunu təsdiqləyib.