Avropada market rəflərində satılan qida, təmizlik və şəxsi qulluq məhsullarının üzərində istifadə olunan ekoloji ifadələrlə bağlı yeni qaydalar qüvvəyə minir. Sentyabrın 27-dən etibarən istehsalçılar “ekoloji”, “təbiət dostu” və “bioloji parçalana bilən” kimi ifadələri əsaslandırmadan məhsul qablaşdırmasında istifadə edə bilməyəcəklər.

Yeni qaydaların əsas məqsədi istehlakçıların ekoloji həssaslığından istifadə edən və “yaşıl yuma” kimi tanınan marketinq üsullarının qarşısını almaqdır.

AB-nin 2024/825 saylı direktivi çərçivəsində sübut edilə bilməyən ekoloji iddiaların məhsul qablaşdırmasında və reklamlarında istifadəsinə məhdudiyyətlər tətbiq olunur.

Yeni qaydalara əsasən, şirkətlər məhsullarını “ətraf mühitə dost” və ya “ekoloji” kimi təqdim etmək üçün bu iddiaları müvafiq sənədlər və sertifikatlarla əsaslandırmalı olacaqlar.

Sübut edilə bilməyən ekoloji iddiaların qablaşdırmada və reklam materiallarında istifadəsinə icazə verilməyəcək.

Yeni tənzimləmə məhsulun yalnız bir hissəsinin ekoloji xüsusiyyətinin bütün məhsula aidmiş kimi təqdim edilməsinin də qarşısını almağı hədəfləyir.

Məsələn, yalnız qablaşdırmanın təkrar emal edilmiş materialdan hazırlanması məhsulun bütövlükdə təbiət dostu olduğu təəssüratını yaratmamalıdır.

Əgər məhsulun yalnız müəyyən hissəsi ekoloji üstünlük təşkil edirsə, bu məlumat etiketdə açıq şəkildə göstərilməlidir.

Bundan başqa, yalnız emissiyaların kompensasiya edilməsinə əsaslanan “iqlim baxımından neytral” kimi ifadələrin istifadəsinə də məhdudiyyətlər gətirilir.

Yeni qaydalar ekoloji və üzvi məhsulların satışının tamamilə dayandırılması demək deyil.

Rəsmi qurumlar tərəfindən təsdiqlənmiş üzvi sertifikata malik məhsullar market rəflərində əvvəlki kimi satıla biləcək.

Əsas məqsəd sənədsiz, sübuta əsaslanmayan və istehlakçını çaşdıra biləcək ekoloji marketinq ifadələrinin qarşısını almaqdır.

Türkiyədə də Tarım və Orman Nazirliyi qida məhsullarının etiketlərində istehlakçını çaşdıra biləcək ifadələrə qarşı nəzarəti gücləndirib.

Yeni qaydalar çərçivəsində “100 faiz təbii”, “əsl”, “təzə sıxılmış” kimi şişirdilmiş və yanıltıcı ifadələrin istifadəsinə məhdudiyyətlər qoyulub.

“Gündəlik” ifadəsinin isə yalnız raf ömrü 24 saat olan məhsullarda istifadə edilməsinə icazə verilir.

İstehlakçıları yanıltan şirkətlər üçün inzibati cərimələr və məhsul qablaşdırmasının dəyişdirilməsi tələbi nəzərdə tutulur. Sənayedə fəaliyyət göstərən şirkətlərin yeni qaydalara tam uyğunlaşması üçün son tarix 31 dekabr 2026-cı il olaraq göstərilir.