Lənkəranın Göyşaban kənd sakinləri də yolsuzluqdan şikayətçidir. Sakin Zülfiyyə Qasımovanın sözlərinə görə, bir neçə ailə 15 ildən çoxdur ki, Göyşaban kənd bələdiyyəsindən ərazidə torpaq alaraq ev tikib. Ancaq indi o evlərə yetişmək üçün yol yoxdur. Demələrinə görə, torpaq sahələri satılarkən ərazidə yol və digər problemlərin tezliklə həll olunacağı vəd edilib. İllər keçsə də, problemlər həllini tapmayıb:

“Onsuz da çətinlik çəkirdik, üstəlik, sakinlərdən biri istifadə etdiyimiz yeganə yolu beton plitələrlə bağlayıb. Evimizdən çıxıb beton plitələrin üstündən hoppanaraq gedib-gəlirik. Maşınla əraziyə yaxınlaşa bilmirik, maşınlarımız beton plitələrin o tayında qalıb”.

Yolu bağladığı bildirilən sakinsə Cavid Ağayevdir. Deyir, elə o da nə edibsə, yolsuzluq üzündən edib:

“Torpaq alıb ev tikmişik, yolumuz yoxdur, mən də məcbur oldum ki, evimizə gedib-gəlmək üçün kanalın üzərindən müvəqqəti kiçik yol salım. 100 maşınadək qum, çınqıl alıb tökmüşəm. Mal-qara keçəndə o korpü də dağılmasın deyə, beton plitələrdən möhkəmləndirmə işi görmüşəm. Bələdiyyə yol problemini həll etsin, biz də normal yoldan istifadə edək, o plitələri də söküb ataq”.

Sakinlər kənd bələdiyyəsindən yolun abadlaşdırılmasını istəyirlər və qeyd edirlər ki, məsələ ilə bağlı dəfələrlə yerli icra hakimiyyətinə müraciət etsələr də, onları eşidən olmayıb.

İddia olunanlarla bağlı dia.az olaraq qarşı tərəfi də dinləməyə hazırıq...