Paytaxtın Suraxanı rayonunda yerləşən Kəlbəcərin 108 saylı orta məktəbdən xəbər var. Teref.az-ın məlumatına görə, Demokratik.Az-ın əldə etdiyi xəbər isə köhnə idimin, məktəbdə baş qaldıran özbaşınalıqların təkrarı sayıla bilər.
Əldə etdiyimiz məlumata görə, məktəb idarəedilməz şəkildədir. Məktəbdə şagirdlər əsasən “aylıq”dadır. Gəlməyənlərə "qaib" yazan müəllimlər isə incidilir. Səbəb də bu tədris ocağında bir-birini əvəz edən xanım direktorların özfəaliyyətə güc vermələri, işlərini zamanın və qanunların buyuruğu ilə deyil, məktəbi daha çox özfəaliyyətlə, çəxsi mənfəətlərlə yürütmələrilə bağlıdır.
Hələ ötən illərdə yayılan məlumatlarda iddia edilirdi ki, məktəbin sabiq direktoru Bəsti Hüseynova əsasən yuxarı siniflərin şagirdlərini “aylığa” buraxıb. Nəticədə məktəbdə tədrisin səviyyəsi və keyfiyyəti aşağı düşüb, bugün də pis ənənə yeni direktor Ülkər Quliyeva tərəfindən məqsədli şəkildə davam etdirilir.

Məktəbin 22 ildir fizika müəllimi işləyən və şagirdlərin davamiyyətinə dair üsyan edən Aynur Məhişovanın saytımıza bildirdiyinə görə, məktəbdəki nöqsanları dediyinə və jurnalda gəlməyən şagirdlərə "qaib" yazdığına görə hazırda incidilir, direktor vəzifəsini müvəqqəti icra edən Ü.Quliyeva tərəfindən işdən çıxarılacağı ilə hədələnir. Müəllimə də təsdiq edir ki, məcburi köçkün məktəbində müəllim-şagird münasibətləri uzun illərdir ki, lap alver çərçivəsində qurulub. Müəllimə şagirdlərdən davamiyyət tələb edib digər nöqsanları qabartdığına görə "töhmət" belə verilib. Müəllim özünə qarşıqərəzli şəkildə elan edilən "töhmət"-in ləğvi üçün məhkəməyə də müraciət edib. Məktəb rəhbərliyi müəllimdən davamiyyətə və digər özbaşınalıqlara göz yummasını tələb edirlər.
Demokratik.Az məktəb barədə internet üzərindən qısa araşdırma aparıb. Müəyyən edib ki, hazırda da məktəbdə özünü "direktor" kimi aparan Bəsti Hüseynova 2019-cu ilin oktyabrında sabiq Təhsil naziri Ceyhun Bayramovun əmri ilə Kəlbəcər rayonu 108 nömrəli tam orta məktəbin direktoru vəzifədən kənarlaşdırılıb. Səbəb isə sabiq direktorun müəllimlərdən pul yığması ilə bağlı fakt olub. Təhsil nazirliyinin yoxlaması müəyyən edib ki, təhsil müəssisəsinin yerləşdiyi bina qəzalı vəziyyətdə olduğu üçün yeni binanın tikintisi zamanı tədris prosesinin başqa binada keçirilməsinə icazə verilib. Binanın daşınma və icarə haqlarının dövlət tərəfindən ödənilməsinə baxmayaraq Bəsti Hüseynova müəllimlərdən vəsait toplayaraq ciddi nöqsana yol verib.

Onu da bildirək ki, sözügedən məktəbin hazırki direktoru son üç ildə müqavilə əsasında ibtidai sinif müəllimi işləyib. Tezliklə də müddətsiz əmək müqaviləsilə müəllim olmağı bacarıb. 2019-cu ildən bu yana isə hansısa himayədarı sayəsində direktor vəzifəsini icra etməyə başlayıb.

Hazırki gedişdən o da aydın olur ki, məktəb direktorluğu vəzifəsi vakansiyaya ya çıxarılmayıb, ya da açıq məlumat bazasından gizlədilib. Hazırki direktorla Bəsti Hüseynovanın məktəbi əlbir idarə etmələrinə dair fikirlər də var.

Deyilən faktlar üzrə rayon təhsil şöbəsinin müdiri Namiq Rəcəbovun da kifayət həddə bilgisinin olduğunu nəzərə alsaq, belə çıxır ki, dərsə gəlməmək üçün “aylıq” verən şagirdlərin pulundan məktəb direktoru təhsil şöbəsi müdirinə də "özəl" pay çatdırır.

Unutmayaq ki, bu günlərdə Bakı şəhər Nefçilər metrosunun yaxınlığında anasını qətlə yetirən 15 yaşlı məktəbli Polisə izahatında bildirib ki, təhsil aldığı Kəlbəcər rayon 23 nömrəli məktəbin 9 cu sinifində oxuyur. izahatında onuda qeyd edib ki, 23 nömrəli məktəbin ünvanını belə tanımır. Bu mənada bütün ölkə məktəblərində, eləcə də Kəlbəcər rayon məktəblərində davamiyyətin diqqətdə saxlanılması vacib amildir. Bu amil direktorların və təhsil kuratorlarının "qara kassası"nı yoxsullaşdırası, "yeyib-içən oğlanlar"ın kayfına acı soğan doğrasa da...
Demokratik.Az sadalananlarla əlaqədar Kəlbəcər Rayon Təhsil Şöbəsinin müdiri Namiq Rəcəbovla əlaqə saxlayıb. Rəcəbovla telefon əlaqəsi zamanı o, verilən suallara cavab olaraq yazılanların tezliklə araşdırılacağını və saytımıza məlumat veriləcəyini bildirib. Fəaliyyəti narazılıqlar yaradan Namiq Rəcəbov qısa arayışla mövzuda yer alan mühüm mahiyyət və detallardan sadəcə olaraq yayınıb.
İnanaq ki, təhsil nazirliyi və Şərqi Zəngəzur Regional Təhsil İdarəsi yazılanlara diqqət ayıracaq, Kəlbəcər məktəblərində tuğyan edən anoloji nöqsanlara "DUR!" deyəcək.