Ermənistanın Tavuş vilayətinin Ayqepar kəndi yaxınlığında yerləşən Azərbaycan mövqeyində aparılan mühəndis işlərindən sonra ərazinin yeni peyk görüntüləri yayımlanıb.

Musavat.com xəbər verir ki, erməni mənbəsi Azərbaycanın Ayqepar yaxınlığında, sovet dövründəki sərhəddən təxminən 500 metr məsafədə, Ermənistan ərazisi olduğunu iddia etdiyi sahədə mövqeyini möhkəmləndirdiyini bildirib.

Mənbə qeyd edib ki, bu barədə daha əvvəl də məlumat yayıb, lakin həmin vaxt təqdim olunan görüntülər daha bulanıq olub.

İndi isə ərazinin daha keyfiyyətli peyk görüntüsü əldə edilib.

Mənbənin məlumatına görə, görüntüdə 2023-cü ildən sonra, əsasən 2024-cü ildə baş vermiş dəyişikliklər aydın görünür.

Mövqenin Ermənistan ərazisində yerləşməsi barədə iddia erməni mənbəsinə məxsusdur və müstəqil şəkildə təsdiqlənməyib.

Bir daha xatırladırıq ki, Ermənistanın revanşist dairələri və onlara yaxın media resursları bu tipli xəbərləri yaymaqla Azərbaycan ordusunun sərhəddəki mövqelərinə münasibətdə necə təşviş içində olduqlarını nümayiş etdirirlər. Onların bu cür məlumatları təqdim etməsi, köhnə xəritələri yenidən gündəmə gətirməsi və hər dəfə Azərbaycan əsgərinin mövqeyini mübahisələndirməyə çalışması həm təxribat xarakteri daşıyır, həm də revanşist düşüncənin hələ də aradan qalxmadığını göstərir.

Bu gün əllərinə sovet dövründən qalma xəritələri alıb, onları sağa-sola yelləyərək hay-küy qoparanlar bir həqiqəti unutmamalıdırlar. İstər peykdən, istər havadan, istər qurudan, istərsə də başqa vasitələrlə xəritələr göstərsinlər, bu, onların 30 ilə yaxın Azərbaycan torpaqlarını işğal altında saxladıqları faktını dəyişmir.

Bu gün Azərbaycanla xəritə söhbəti edənlər, sərhədlərin toxunulmazlığından, dövlətlərin suverenliyindən, ərazi bütövlüyündən və beynəlxalq hüquqdan danışanlar vaxtilə həmin prinsipləri özləri pozmamalı idilər. Azərbaycanın beynəlxalq səviyyədə tanınmış ərazilərini 30 ilə yaxın işğal altında saxlayanlar indi sərhəd və xəritə məsələlərində özlərini beynəlxalq hüququn müdafiəçisi kimi təqdim etməyə çalışırlar.

Bəs həmin beynəlxalq hüquq Azərbaycan torpaqları işğal altında saxlanılarkən harada idi? Nə üçün bu gün hərbi mövqelərin yerini ölçən, sovet xəritələrində metr hesablayan dairələr o zaman Azərbaycanın beynəlxalq səviyyədə tanınmış sərhədlərinə hörmət etmirdilər?

Bu gün Azərbaycan əsgərinin mövqeyi ətrafında hay-küy qoparanlar bilməlidirlər ki, Azərbaycan Ordusu 2020-ci ildə torpaqlarının böyük hissəsini işğaldan azad edib, 2023-cü ilin sentyabrında isə ölkəmizin bütün ərazisində suverenliyini tam bərpa edib.

İndi Azərbaycanın hərbi mövqelərini müzakirəyə çıxaran revanşist dairələr əvvəlcə öz keçmişlərinə baxmalıdırlar. Onlar 30 ilə yaxın davam edən işğal siyasətinin hansı nəticələrə gətirib çıxardığını unutmamalıdırlar.

Azərbaycan əsgəri bu gün öz dövlətinin təhlükəsizliyini qoruyur. Azərbaycan sərhədlərinin hüquqi müəyyənləşdirilməsi isə beynəlxalq hüquq və delimitasiya prinsipləri əsasında həyata keçirilir. Heç bir köhnə xəritə ətrafında qaldırılan hay-küy Azərbaycanın ərazi bütövlüyünü və bərpa edilmiş suverenliyini şübhə altına ala bilməz.

Azərbaycan Ordusu öz sözünü döyüş meydanında deyib. İşğala son qoyulub, ərazi bütövlüyümüz və suverenliyimiz bərpa edilib. İndi isə qalanını Ermənistanın revanşist dairələri düşünsün. Onlar anlamalıdırlar ki, Azərbaycanı yenidən köhnə xəritələr və keçmişin işğalçı düşüncəsi ilə üz-üzə qoymaq cəhdləri regiona heç nə qazandırmayacaq.