Bakı şəhəri və Bakıətrafı bəzi yaşayış ərazilərində su təchizatında fasilələr müşahidə edilir.

İri Şəhərlərin Birləşmiş Su Təchizatı Xidmətindən bildirilib ki, su təchizatındakı fasilələr müəyyən səbəblərlə bağlıdır.

"Yay mövsümündə havaların kəskin istiləşməsi nəticəsində suya olan tələbatın artması təbiidir. Mövcud qurğuların və sudaşıyıcı kəmərlərin ifrat yüklənməsi nəticəsində qəza risklərini də minimuma salmaqla tələbatın maksimum optimal qarşılanması üçün tənzimlənmə işləri aparılır", - açıqlamada bildirilir.

Qeyd olunub ki, Bakı şəhərinin əsas su təminatçısı olan Ceyranbatan, Oğuz-Qəbələ-Bakı, Kür sutəmizləyici qurğuları komplekslərində suyun istehsal həcmlərinin artırılması, sudaşıyıcı magistral kəmərlərin, hövzələr üzrə supaylayıcı şəbəkələrin, qurulması istiqamətində yeni layihələrin icrası intensiv şəkildə davam etdirilir.

Hazırda da əksər ərazilərdə su təminatı normal rejimə qaytarılıb.