Bu il qərb bölgəsinə qar yağmaması bir sıra kənd təsərrüfatı məhsullarının səpinini tezləşdirib. Artıq bir neçə gündür Tovuzda böyüklü-kiçikli demək olar ki, hər kəs sahələrdə kartof əkini ilə məşğuldur.

Havanın günəşli keçməsi bölgə üçün xarakterik olan bitkinin əkinini bir ay tezləşdirib. Fermerlər deyir ki, əkilən kartofu daha dərin çalalara basdırırlar ki, növbəti günlərdə əgər qar yağarsa ona təsir etməsin. Yox əgər havanın mülayim olması davam edərsə gələcəkdə yüksək məhsuldarlıq əldə olunacaq.
Fermerlər bu il əsasən Gədəbəy və Tovuzun ucqar dağ kəndlərindən alınan toxumları sahələrə səpirlər. Cücərdilmiş kartoflar şumlanmış əkin sahələrinə əllə basdırılır. Bu da onun torpağın altında inkişafına şərait yaradır. Məhsuldar toxumlara üstünlük verən kəndlilər ötən ilə nisbətən bu il səpdikləri kartofu baha qiymətə aldıqlarını dedilər.
Ötən il Tovuzda 6500 hektardan çox sahədə kartof əkilib, bu il isə əkin sahələrinin daha da genişləndirilməsi planlaşdırılır.

kepeztv.az