PSG-nin təcrübəli hücumçusu Zlatan İbrahimoviç UEFA-nın saytının bir sıra suallarını cavablandırıb. Goal.az xəbər verir ki, isveçli ulduz Çempionlar Liqasında komandasının çıxışı və şansları barədə danışıb.

- PSG ilə növbəti dəfə Çempionlar Liqasının 1/4 finalında oynayırsan. Bu klubla tarix yaza biləcəksənmi?

- Həmişə məqsəd mümkün qədər irəliləməkdir. Amma bundan irəli gedə bilmirik. Çempionlar Liqası belədir, öncədən proqnoz vermək olmur. Əlindən gələni etsən də, nə olacağını bilmirsən. Ötən mövsümə nisbətən güclənmişik. Təcrübəmiz də artıb. Buna görə bir neçə il öncə qurulan gənc heyət 1/4 finaldan artığını istəyir.

- Bu mövsüm öz çıxışından razısan?

- Oyunumdan həzz alıram. Çünki mövsüm başlamazdan əvvəl bir sıra müzakirələr vardı. İnsanların nə danışdığınıa fikir vermədim. Əvəzində indi oyunumdan həzz alırlar. Etmək istədiyim də budur: insanları sevindirmək. Karyeramın zirvəsindəyəm. Bundan yaxşı oynamamışam. Mənim vəziyyətim qoca doğulub gənc ölməyə bənzəyir.

- Yaşın artdıqca medandakı xüsusi anları qiymətləndirirsən?

- Bəli. Bunun pisxoloji amil olduğunu düşünürəm. Fikirləşdiyin qədər cavan və gümrahsan. Yaş sadəcə rəqəmdir. Bu mövsüm daha yaxşı görünürəm. İnsanın nə qədər cavan və ya yaşlı olduğuna beyni qərar verir. Bu il qərara aldım ki, çox gəncəm.

- Fransa daxilində bütün titullara sahib çıxmısan. ÇL kubokunu Parisə gətirmək necə olar?

- Mən titul qazanmaq üçün oynayıram. Turnirdən asılı olmayaraq mükafatı qazanmaq üçün fədakarlıq etməyə hazıram. Komanda yoldaşlarım bütün titullara sahib çıxmaq istəyirlər. Elə burada olmağımızın səbəbi də budur - məşq etmək, diqqəti cəmləşdirmək, hazırlaşmaq və planlarımızı həyata keçirmək.