Bərdədə ölüm ilə nəticələnən yol qəzaları baş verib. Bakı, Quba və Sumqayıtdakı hadisələr də xəsarətsiz ötüşməyib.

Bərdədə bir nəfərin ölümü, 3 nəfərin xəsarət alması ilə nəticələnən avtomobil qəzası rayonun Şorəlli kəndi ərazisindən keçən hissəsində qeydə alınıb. Tərtər rayon sakini Qəhrəman Qurbanovun idarə etdiyi, “NAZ LİFAN” markalı minik maşını hərəkətdə olarkən yolu iki hisssəyə ayıran dəmir ayrıca çırpılıb. Zərbənin təsirindən yararsız hala düşən maşında olanlar-84 yaşlı Həmayə Qurbanova, 83 yaşlı Humay Qurbanova və 1 yaşlı Münəvvər Qurbanova bədən xəsarətləri alıblar. Onlar dərhal Bərdə Mərkəzi Rayon Xəstəxanasına yerləşdiriliblər. Həkimlərin səyinə baxmayaraq, ağır xəsarət alan Humay Qurbanovanın həyatın xilas etmək mümkün olmayıb. Hadisə yerinə BDYPİ-nin rəsmiləri cəlb olunub. Aparılan ilkin araşdırmalardan sonra qəzaya səbəb kimi avtomobilin yüksək surətlə idarə edilməsi göstərilib.

Sumqayıtda isə şəhər sakini Valeh Vəliyevin idarə etdiyi “Hyundai” markalı avtobus və Qobustan rayon sakini Elman Əhmədovun idarə etdiyi “KamAZ” markalı avtomobillər toqquşub. Nəticədə “Hyundai” aşıb. “KamAZ” isə Abşeron rayon sakini Adil Cəlladovun idarə etdiyi “VAZ-21214” markalı avtomobilə dəyib. Qəza zamanı avtobusda olan 3 sərnişin xəstəxanaya yerləşdirilib. Həkimlər yaralıların vəziyyətini orta-ağır olaraq qiymətləndirir.

Bakıda da yol qəzası baş verib. Hadisə paytaxtın Səbail rayonu ərazisində üzü binə ticarət mərkəzi istiqamətində qeydə alınıb. “Pajero”nun sürücüsünün anidən əyləci basması “Mercedes”lə toqquşmaya səbəb olub. Qəza zamanı “Mercedes”də olan 2 az yaşlı uşaq və bir qadın, həmçinin “Pajero”da olan sərnişinlərdən biri xəsarət alıb. Yaralılar təcili tibbi yardım avtomobili ilə 1 saylı şəhər kliniki xəstəxanasına çatdırılıb. Yol- nəqliyyat hadisəsinin səbəbləri avtotexniki ekspertizadan sonra məlum olacaq.

Bakı-Quba yolunda baş verən qəzada “Mercedes”lə "Mitsubişi" toqquşub. Qubanın Atuc kəndi ərazisində qeydə alınan hadisədə bir nəfər xəsarət alıb. Quba Mərkəzi Rayon Xəstəxanasına yerləşdirilən yaralının vəziyyəti ağırdır.

Bütün faktlarla bağlı BDYPİ-nin İstintaq və Təhqiqat Şöbəsində araşdırmalara başlanılıb.

kepeztv.az