İstirahətə gedənləri daşıyan avtobus yük maşını ilə toqquşub.

Avropanın mərkəzində tükürpədici qəza baş verib. Fransa günə acı xəbərlə başlayıb.

ANS PRESS-in məlumatına görə, hadisə Fransanın cənub-qərbində baş verib. Səyahətə gedənləri daşıyan avtobusun qəzaya uğraması nəticəsində ilkin olaraq 40 nəfərin öldüyü deyilsə də, sonradan ölənlərin sayının 42-ə çatdığı qeyd olunub. Hadisə yerinə çoxlu sayda təcili yardım maşınları, yanğınsöndürmə xidməti və polislər cəlb olunub.
Yanğınsöndürmə xidmətinin verdiyi məlumata əsasən, insidentin baş verməsinə səbəb avtobus ilə yük maşının toqquşması olub. Onların sözlərinə görə, avtobusla 50-yə yaxın adam olub və onlar istirahətə gediblər. Libörn şəhərindəki şosse yolunda yük maşının qəfil avtobusun qarşısına keçməsi faciəni qaçılmaz edib.
İki nəqliyyat vasitəsinin toqquşması nəticəsində avtobus yanıb. Qəza zamanı ağır xəsarət alan 5 nəfər xəstəxanaya çatdırılıb.
Faciə ilə bağlı ölkə prezidenti Fransua Ollanda başsağlığı verib. O, baş verən hadisəyə görə, böyük kədər hissi keçirdiyini dilə gətirib.
Çoxlu insan itkisi ilə nəticələnən bu yol qəzası son 33 ildə baş verən ən ağır qəza hesab edilir. Ən son belə hadisə 1982-ci ildə Fransanın şərqində yerləşən Kot Dor ərazisində baş verib. Nəticədə 44-ü uşaq olmaqla, ümumilikdə, 53 nəfər dünyasını dəyişmişdi.