Son bir il ərzində iki ölkə arasında ilk yüksək səviyyəli görüş olacaq.

ABŞ Prezidenti Barak Obama rusiyalı həmkarı Vladimir Putinlə görüşmək qərarına gəlib.

ANS PRESS-in məlumatına görə, bu haqda "Nyu-York Tayms" qəzeti məlumat yayıb.

İki ölkə liderinin görüşü gələn həftə BMT Baş Assambleyasının Nyu-Yorkda keçirilən sesiyası zamanı baş tutmalıdır. Əgər görüş baş tutsa bu son 1 il ərzində iki ölkə arasında ilk yüksək səviyyəli görüş olacaq. Ukrayna münaqişəsinə görə Putinlə görüşmək istəməyən Obama indi bu görüşü faydalı sayır.

ABŞ hökuməti hesab edir ki, bu görüş Ukrayna münaqişəsi ilə bağlı Minskdə əldə edilmiş atəşkəs sazişinə əməl edilməsi və Suriya münaqişəsinin diplomatik həlli yollarının tapılmasında faydalı ola bilər. Rəsmi Ağ Ev hələlik məlumata rəsmi münasibət bildirməyib.
Rusiya Federasiyasının rəsmiləri isə son günlər ABŞ prezidenti ilə görüşməkdə maraqlı olduqlarını bəyan ediblər. Amma Obamanın müşavirləri Rusiyanın Suriyada hərbi iştirakının artdığı bir dövrdə Rusiya ilə iş görməyin mümkünlüyünə şübhə ilə yanaşırdılar. Onların bəziləri hesab edir ki, belə bir görüş Vladimir Putinin xeyrinə və onun üçün mükafat olardı.

"Prezident Putin ələlxüsus da öz amerikalı həmkarı, prezident Obama ilə dialoqa həmişə hazırdır", – deyə bu barədə Putinin mətbuat katibi Dmitri Peskov bildirmişdi.
Bundan qabaq xarici işlər naziri Sergey Lavrov bəyan eləmişdi ki, iki ölkə prezidentlərinin BMT Baş Məclisinin sentyabrın 28-də başlayacaq 70-ci yubiley sessiyası çərçivəsində görüşü istisna deyil. Onun sözlərinə görə, görüş baş tuta bilər, əgər istəklə bağlı siqnal ABŞ tərəfindən daxil olsa.