Baş verən partlayışa görə məsuliyyəti heç bir qruplaşma üzərinə götürməyib

Yəmənin paytaxtı Sənanın Əl- Balili məscidində partlayış baş verib.

ANS PRESS-in məlumatına görə, Qurban bayramı ilə bağlı məsciddə təşkil edilən ibadət zamanı iki terorrçu tərəfindən partlayış törədilib.

Məlumatlara görə, partlayış zamanı 29 nəfər həlak olub, xeyli insan isə xəsarət alıb. Şəhər sakinlərinin sözlərinə görə əl- Balili məscidində husilər və Yəmən hökümətinə qarşı vuruşan silahlılar yığışırlar.

Partlayışa görə hələlik heç bir qruplaşma məsuliyyəti öz üzərinə götürməyib.

Yəmən hökümətinin siyasətindən narazı olan Husi üsyançıları Səna şəhərini 2014-cü ilin sentyabr ayında nəzarətə alıblar. 2015- ci ilin mart ayında isə üsyançılar strateji cəhətdən əlverişli şəhər olan Əden şəhərini də ələ keçiriblər. Bundan sonra ölkə prezidenti Əbd Rabbuh Mansur əl-Hadi ölkəni tərk edərək Səudiyyə Ərəbistanına qaçıb.
Bu ayın sonunda isə Səudiyyə Ərəbistanının başçılıq etdiyi koalisiya qüvvələri ölkədə prezidenti yenidən hakimiyyətə gətirmək üçün əməliyyatlara başlayıblar. Hava əməliyyatları nəticəsində Yəmənin yüzlərlə vətəndaşı həyatını itirib. Iran isə koalisyanın bu addımını soyqırım adlandırıb.

Birləşmiş Millətlər Təşkilatının (BMT) məlumatına görə, Yəməndə son 4 ay ərzində baş verən konfliktlər nəticəsində 4,5 minə yaxın insan həlak olub.