Yeni qərar qəbul edilib

Rusiya Federasiyası baş naziri Dmitri Medvedev 2018-ci ildə futbol üzrə Dünya çempionatının keçirilməsi üçün inşa edilən obyektlərdə işə cəlb edilən xarici və vətəndaşlığı olmayan şəxslərə Rusiyada müvəqqəti yaşayış üçün icazənin sadələşdirilməsi haqqında qərar qəbul edib.

Azerinfo.az xəbər verir ki, müvafiq sənəd Rusiya Nazirlər Kabinetinin saytında dərc edilib.

Qərara müvafiq olaraq işverən və sifarişçilər xarici işçilərin Rusiya ərazisinə gəlmələri üçün dəvəti asanlaşdıra və tez şəkildə qeydiyyatdan keçirə bilərlər. İndi belə ərizələrin baxılma müddəti 15 sutkaya qədər azaldılıb. İşçilər isə öz növbəsində iş və müvəqqəti yaşayış üçün 50 sutka müddət ərzində izin ala bilərlər.

Bu yenilik yalnız Dünya çempionatının keçiriləcəyi obyektlərin tikilməsi üçün mülki-hüquqi müqavilələr bağlamış hüquqi və ya fiziki şəxslərə aiddir.

İzahat sənədində bildirilir ki, qəbul edilmiş qərar, 2018-ci ildə Rusiyada futbol üzrə Dünya çempionatının keçirilməsi üçün bütün lazımi şəraitin yaradılması üzrə tədbirlər kompleksini zamanında həyata keçirməyə imkan verəcək.