Ərəb mətbuatında təşkilatın labüd ləğvi haqqında xəbərlər yayılıb

Ərəb mətbuatında "Əl-Qaidə" terror təşkilatının labüd ləğvi haqqında xəbərlər yayılıb.

ANS PRESS-in məlumatına görə, terror təşkilatının bu il ərzində ləğv edilməsi gözlənilir. "Əl-Qaidə"nin hakim strukturlarının mənbələrinə brbaşa girişi olan və Dubayda yerləşən "5 Dimensions" şirkəti terror təşkilatının gələcəyi ilə bağlı qiymətləndirməni dərc etdirib. Həmin sənəddə deyilir: "Əl-Qaidə" bu il rəsmi olaraq ləğv ediləcək".

"Əhrar əş-Şam"dan olan mənbələrin məlumatına görə, "Ən-Nusra Cəbhəsi" öz müttəfiqlərinə bildirib ki, o, "mütəşəkkil" formada və əvvəlcədən yaradılan plana uyğun olaraq "Əl-Qaidə"nin tərkibindən çıxacaq və "Əl-Qaidə" özünün buraxılmasını elan edəcək.
Bundan başqa terror təşkilatının lideri Ayman əz-Zəvahirinin öz səlahiyyətlərindən imtina edəcəyi də qeyd edilib. Həmçinin bildirilib ki, o, terror təşkilatının bütün dünyadakı filiallarını sədaqət andından azad edəcək.
"Zəvahirinin nüfuzu artıq o qədər də qüvvətli deyil və "Əl-Qaidə"nin birliyi üstünlükdən çox, bir yükə, əngələ çevrilib. Bu da təşkilatın iki əsas qoluna Suriya və Yəməndə mübarizə aparmağa mane olur", - deyə təşkilatın ləğvinin səbəbini belə izah ediblər. "Əl-Həyat" qəzeti isə bildirib ki, Zəvahirinin belə bir qərar qəbul etməkdə məqsədi tabeliyində olan silahlıları sədaqət andından azad etmək və onların İŞİD kimi daha güclü terror təşkilatlarına qoşulmasına imkan yaratmaqdır.