Xəbər verdiyimiz kimi, Ukrayna genişmiqyaslı pilotsuz təyyarə və raket hücumuna məruz qaldığı üçün enerji atəşkəsi faktiki olaraq başa çatıb. İlk zərbələrin əsas hissəsi Kiyev və Xarkov şəhərlərinə endirilib. Hər iki şəhərdə çoxsaylı partlayış səsləri eşidilib.

Kiyev meri Vitali Kliçko Darnitski rayonunda qeyri-yaşayış binasına və uşaq bağçasına zərbə endirildiyini bildirib. Kiyev Şəhər Hərbi Administrasiyası da Desnyanski rayonunda qeyri-yaşayış binasına, Şevçenkivski rayonunda isə çoxmərtəbəli binaya zərbə endirildiyini təsdiqləyib.

Xarkovda hücum bir neçə saat davam edib. Mer İqor Terexov bildirib ki, zərbələr əsasən enerji infrastrukturu obyektlərinə dəyib və zərər ciddi qiymətləndirilir. -20 dərəcə Selsidə şəhər hakimiyyəti şəbəkələrin donmasının qarşısını almaq üçün 820 binanın istilik sistemlərindən istiliyi boşaltmaq məcburiyyətində qalıb.

Zaporojye, Dnepr, Odessa və ölkənin digər bölgələrində də partlayışlar qeydə alınıb. Hərbi Telegram kanallarına görə, hücumun hədəflərindən biri Rovno Atom Elektrik Stansiyasını Kiyev və Ukraynanın mərkəzi bölgələri ilə birləşdirən 750 kV-luq yarımstansiya olub.

Hücum davam edir. Monitorinq resurslarına görə, Rusiya həm qanadlı raketlər, həm də kütləvi dron hücumları həyata keçirir. Vinnitsa bölgəsi də hədəflərdən biridir.

Hücumda "Zirkon", "İsgəndər-M", "Kinjal" və "X-22" raketləri, həmçinin "Tornado-S" çoxsaylı buraxılışlı raket sistemlərindən istifadə edilib. "Tu-95MS" strateji bombardmançıları və MiQ-31K qırıcıları havaya qaldırılıb. Gecə Ukraynanın əksər bölgələrində hava hücumu xəbərdarlığı elan olunub.

Zərər görən elektrik stansiyaları bunlardır: Xarkov İES-6, Dnepr Pridneprovskaya İES, Kiyev Trypilskaya İES, Makariv 750 kV-luq Kiyevskaya yarımstansiyası, Kiyev Darnitskaya İES, Xarkov 440 kV-luq yarımstansiyalar, Odessa 330 kV-luq yarımstansiyalar.