Türkiyənin xarici işlər naziri Hakan Fidanın Ermənistanın baş naziri Nikol Paşinyanın yüksək reytinqə malik olması ilə bağlı səsləndirdiyi fikirlər İrəvanda və regionda siyasi rezonans doğurub.

Bu mövzu ilə bağlı çıxış edən erməni analitik Suren Surenyants sosial şəbəkələrdə yazıb ki, Fidanın açıqlamaları dolayı şəkildə Paşinyana dəstək anlamı daşıyır və bu, sadəcə neytral diplomatik mövqe deyil, açıq siyasi siqnaldır.

Qeyd edək ki, Surenyants Ermənistanın keçmiş prezidentləri Robert Koçaryan–Serj Sarkisyan siyasi xəttinə yaxınlığı, revanşist mövqeyi və açıq ruspərəst çıxışları ilə tanınır. O, Paşinyana qarşı sərt mövqedə çıxış edən və Moskvanın Ermənistandakı təsirinin qorunmasını müdafiə edən analitiklər sırasında yer alır.

Surenyantsın fikrincə, Türkiyə tərəfinin Paşinyanın “konstruktiv siyasətini” vurğulaması Ermənistan hakimiyyəti tərəfindən seçkilər ərəfəsində daxili auditoriyaya mesaj kimi istifadə oluna bilər. Bu mesajın mahiyyəti ondan ibarətdir ki, mümkün hakimiyyət dəyişikliyi ölkə üçün təhlükəsizlik risklərini, o cümlədən müharibə ehtimalını artıra bilər.

O, bu yanaşmanı seçkiöncəsi qorxutma texnologiyası adlandırır.

Xatırladaq ki, Hakan Fidan mətbuat konfransında bildirib: “Biz görürük ki, Paşinyan hazırda ictimai rəy sorğularında liderdir. Biz onun oynadığı konstruktiv rolu dəstəkləyirik. Bu xətt, bu iradə davam etməlidir”.