Şikayətçi İcra Hakimiyyəti qarşısında özünü doğradı

Bu gün Cəlilabad Rayon İcra Hakimiyyətinin binası qarşısında intihara cəhd baş verib.

Rayondakı mənbələrdən bəlli olub ki, polis və məhkəmənin qanunsuzluğundan icra başçısına şikayət etmək istəyən Alar kəndindən Əliyevlər ailəsi zorakılıqla üzləşib. Buna görə də ailə üzvlərindən biri – Tərlan Əliyev özünü bıçaqla doğrayıb. Daha iki nəfər isə özünü yandırmaq istəyib, lakin ətrafdakılar onlara mane ola biliblər. Daha sonra şikayətçilər polis şöbəsinə aparılıblar.

Yaralı Tərlan Əliyev isə rayon xəstəxanasına yerləşdirilib.

Ailə başçısı Füzuli Əliyev, onun yetkinlik yaşına çatmamış oğlu Allahverdi Əliyev və qardaşı oğlu Rüstəm Əliyev hazırda polis şöbəsindədirlər.

Məlumata görə, baş verənləri telefonla çəkmək istəyənlərə də zor tətbiq olunub. Onların telefonları əllərindən alınıb və sındırılıb./azadliq

Xatırladaq ki, Zaman-zaman Cəlilabad rayonunda icra başçısı və onun ətrafında olan yüksək vəzifəli şəxlərlə bağlı ciddi qanun pozuntuları müşahidə edilməkdədir. Bir müddət öncə biz icra başçısının səhiyyə sistemini çökdürməsi, insanların bu sahədə ciddi bürökratik əngəllərlə qarşılaşması barədə yazı dərc etmişdik.
Redaksiyamıza daxil olan növbəti şikayət isə Cəlilabadda icra başçısı Əziz Əzizovun təhsil sahəsinə əl qoyması, işçilərin əmək haqqlarının mənimsənilməsi ilə bağlıdır.

Məsələnin maraqlı tərəfi ondan ibarətdir ki, icra başçısı təhsil işçilərinin əmək haqqlarının mənimsənilməsi “əməliyyatında” rayon məhkəməsinin və polis rəisinin əməyindən istifadə edir.

Məktubu olduğu kimi təqdim edirik.

“Cəliabad rayon təhsilinin bərbad vəziyyətə salınmasına səbəbkar olan kadrların himayəçisi olan İcra başçısı Əziz Əzizov bu dəfəfə bir az da qabağa getdi. Cəlilabad rayon Təhsil İşçilərinin Maarifyanı Şurasına Rayon Təhsil Şöbə müdiri deyil özü rəhbərlik edərək açıq şəkldə bəyan etdi ki, hamı qoyulan tası vaxtında versin və kimsə problem yaratmağa çalışmasın. Devalvasiya və yoxsulluq səbəbindən pulu ödəyə bilməyəcəyini elan edərək Rayon Təhsil Şöbəsində narazılıq edən müəllimlər haqqında rayon rəhbərinə məlumat verən kimi İcra başçısı Əziz Əzizov, məhkəmə sədri Əliəjdər Ələkbərov və polis rəisi Namiq Camalov RTŞ-yə gələrək bir neçə nəfəri işdən uzaqlaşdırmaqla etirazı boğublar. Artıq ikinci aydır müəllimlər maaşlarını almıyiblar və bu barədə şikayət edilməsinə baxmayaraq heç bir nəticə əldə edilmir. Belə getsə Təhsil İşçilərinin kütləvi etiraz aksiyasına çıxacaqlar”