Gəncənin Mahrasa Bağı yaşayış massivinin sakinləri binaların qarşısındakı qurumuş ağacların yaratdığı təhlükədən narahatdırlar. 40-45 yaşı olan qurumuş ağaclar real təhlükə mənbəyi olduğundan əsən hər külək böyük budaqların qırılaraq yerə tökülməsi ilə nəticələnir.

Hələ sovet dönəmində əkilən qovaq ağaclar 15-20 metr hündürlüyə qədər qalxıb. Budaqları çürük və kövrək olduğundan küləkli havalarda ağacların aşma ehtimalı böyük olur. Mahrasa Bağının sakinlərinin bildirdiklərinə görə, ağaclar budanmadığından binalarda yaşayan sakinlərin xəsarət almasına və sağlamlıqlarına ciddi təhlükə yaranır.

Rəşad Həsənov – sakin: “Təhlükə odur ki, görüsüz də maşınlar dayanır, külək əsən kimi qopub düşür üstünə. Bundan başqa uşaq oynayır, böyük keçir, təhlükədir”.
Telman Ramazanov- sakin: “O qovaq ağacları var, onların müddətləri çox azdır. Kökləri də demək olar ki, yoxdur. Baxırsan ki, bir balaca külək olan kimi öz- özünə yıxılır. O da xəsarət yetirir. Ya insana, ya maşına. ya da ki, evə. Bu hadisələr olmadan öncə gərək bunu yığışdıralar. Bir neçə dəfə söhbət olub bu ağacların kəsilməsinə görə. Heç bir aidiyyəti qurum buna fikir vermir”.

Gəncədə ağacların kəsilməsi və ya budanmasını 10 saylı Ekologiya və Təbii Sərvətlər şöbəsinin rəyinə əsasən şəhər Yaşıllaşdırma İdarəsi həyata keçirir.

Məsələ ilə bağlı 10 saylı Ekologiya və Təbii Sərvətlər şöbəsindən isə bildirdilər ki, qurumuş ağaclarla bağlı həmin ərazidə yaşayan sakinlər mütləq şəkildə şöbəyə ərizə ilə müraciət etməlidirlər. Məhz bundan sonra şöbə əməkdaşları həmin əraziyə gedərək, qurumuş ağaca baxış keçirirlər və onun kəsilməsi və ya budanması haqqında rəy verirlər.
Qalib Quliyev- 10 saylı ərazi Ekologiya və Təbii Sərvətlər şöbəsinin sektor müdiri: “Ümumiyyətlə, təhlükəli ağaclarla bağlı və digər ekoloji işlərlə bağlı bizim şöbənin monitorinq sektorunun işçiləri mütəmadi olaraq monitorinqlər keçirir. Sakinlər tərəfindən bizə məlumatlar və ərizə ilə müraciətlər daxil olur. Biz də başlayırıq həmin müraciətlərə əsasən öz işimizi qurmağa”.

Ötən il 10 saylı ərazi Ekologiya və Təbii Sərvətlər şöbəsinə olunan müraciətlər əsasında 90 ağacın budanması həyata keçirilib. Bu ilin yanvar ayında isə 2 ağacın kəsilməsinə rəy verilib.

http://kepeztv.az