“Babək rayon Məhkəməsində dekabrın 1-də keçirilən prosesdə faktlarla sübut olundu ki, Prenetal Mərkəzin keçmiş baş həkimi Kifayət Məmmədova anam Sveta Xudiyevanı ölümə aparan əməliyyatın əleyhinə olub və əməliyyatın keçirilməsi ilə bağlı rəy verməyib. Baş həkim anamın müalicə üçün təcili Türkiyəyə, yaxud Bakıya aparılmasını məsləhət görüb. Lakin, onun israrlarına baxmayaraq, həkim Nəzakət Gülməmmədova anamı əməliyyat edib və bunun qarşılığında yaxın qohumlarımızın birindən 700 manat pul alıb. Həmin qohumumuz bunları öz izahatında da yazılı qeyd edib. Belə çıxır ki, Nəzakət Gülməmmədova 700 manatı bizdən alsın deyə, anamın fiziki vəziyyəti yol vermədiyi halda onu əməliyyat edib və bu da ölümlə nəticələnib”.
Bu sözləri „Gündəlik Naxçıvan“a Babək rayon sakini Cəlil Xudiyev bildirib. O, hüquq mühafizə orqanlarından anasının ölümünə səbəb olan həkim Nəzakət Gülməmmədovanın cəzalandırılmasnı tələb edir:
“O, ən yüksək cəzanı almalıdır. Əməliyyata hazır olmayan anamı hansı məqsədlə bıçaq altına salıb? Belə çıxır ki, maddi tamah ucbatından. O təkcə həkim səhlənkarlığında yox, həm də bu səbəbdən ittiham olunmalıdır. O öz tamahını ört-basdır etmək üçün həm də bizdə belə bir yanlış fikir yaratmışdı ki, guya qohumumuzdan aldığı pulu baş həkim Kifayət Məmmədova ilə bölüb. Bu səbəbdən biz də yanlışlıqla Kifayət Məmmədovanın adını bu işdə hallandırmışıq. Buna görə çox üzgünük. İndi isə faktlarla məlum olur ki, o əməliyyatın qəti əleyhinə olub”.
Sveta Xudiyeva oktyabrın əvvəlində keçirdiyi əməliyyatdan sonra vəfat edib. O zaman yaxınları bildirmişdilər ki, mərkəzin həkimi Nəzakət Gülməmmədova rüşvət ala bilsin deyə, əməliyyata fiziki cəhətdən hazır olmayan Sveta Xudiyevanı bıçaq altına salıb və bu da ölümlə nəticələnib. Faktla bağlı Naxçıvan şəhər Prokurorluğunda cinayət işi açılıb.
Mərhumun yaxınlarının bildirdiyinə görə, Nəzakət Gülməmmədovanın „yuxarlar”da adamı olduğu üçün, prokurorluq onu cinayət işindən yayındırmağa çalışır.
Kifayət Məmmədova Sveta Xudiyevanın ölümündən bir müddət sonra Naxçıvan Prinetal Mərkəzinin baş həkimi vəzifəsindən istefa verib. Onun öz vəzifələrini icra etməsinə imkan verilmədiyi üçün bu addımı atdığı bildirilir. O, bu vəzifəyə yeni təyin olunmuşdu.

Mənbə: „Gündəlik Naxçıvan“