Ağsu rayonunda əhalinin həyat şəraiti ilbəil pisləşir

Bu gün ölkə əhalisinin güzəranının yaxşılaşması, yoxsulluğun azaldılması istiqamətində mühum işlər görülür. Sosial sahənin inkişafı, əhalinin aztəminatlı ailələrinə dövlət qayğısının artması atılan addımların bir hissəsidir. Lakin bu gün dövlət tərəfindən görülən tədbirlərdən öz xeyirlərinə istifadə edənlər də az deyil. Xüsusilə də Azərbaycanın bir sıra rayonlarındakı dövlət qurumları öz mənafelərini güddüklərinə görə əhalinin sosial durumunu pis hala salıblar. Belə rayonlardan biri də Ağsu rayondur.
Ağsu rayonunda əhalinin həyat şəraiti ilbəil pisləşir. Son illərdə bu rayonda işsizlərin sayı durmadan artıb. Əhalinin məşğulluğu lazımınca təmin edilmir. Rayonun ictimai-siyasi fəaliyyətində durğunluq müşahidə olunmaqdadır. Sosial problemlər əhalinin ictiami həyatdakı aktivliyini minimuma endirib. Redaksiyamıza daxil olan şikayət ərizəsində bildirilir ki, Ağsu rayon Əhalinin Sosial Müdafiəsi Mərkəzində heç yerdə baş verməyən qanunsuzluq hökm sürür. Verilən məlumata görə, sözügedən qurum ünvanlı sosial yardımın təyinatı məsələsində şəffaflıq prinsipini gözləmir, mərkəzə müraciət edən vətəndaşların sənədləri yoxlanılmadan geri qaytarılır.
Əvvəlki illərlə müqayisədə bu il mərkəzin işinə dair ərizə və şikayətlərin sayı həddən artıq çoxalıb. Bizə edilən şikayətdə insanların diqqət və qayğıdan məhrum olduqları, bu narazılığın lazımi orqanlara çatmasını istədiklərini bildirirlər.
Rayondan redaksiyamıza bildirildi ki, rayon sakinləri ünvanlı sosial yardımı almaq üçün mərkəz direktorunun tədbiq etdiyi "qanunla" razılaşılmalıdır. Əks halda bir vətəndaşın da belə sosial yardım almasına imkan verilməyəcək. Deyilənlərə inansaq, Seyidməmməd Məmmədov özünəməxsus qanunları o deməkdir ki, vətəndaş ilkin ödəniş etməlidir. Əgər buna imkanı yetmirsə "altı ayı" ona çatdırılmalıdır. Verilən digər məlumatlarda bildirilir ki, həttda imkanı olan vətəndaş 500-1000 manat verdikdən sonra ünvanlı sosial yardım almaq imkanı əldə edir. "Təqdirəlayiq" işlər ancaq və ancaq Məmmədov etibar etdiyi adamlar həyata keçirir. İşsiz sakinlərin ümid yeri ünvanlı sosial yardım olsa da, onlar hələ bugünkü günə qədər ünvanlı sosial yardımdan bəhrələnə bilməyiblər.
Çox təəssüflər ki, baş verən hadisələr onu göstərir ki, ölkəmizdə bu sahəyə nə qədər nəzarət edilsə də, bu kimi durumların qarşısını tam almaq olmur. Və bu səbəbdən də bəzi məmurlar istədikləri kimi hərəkət edirlər. Yalnız öz mənfəətlərini güdür və aztəminatlı ailələr üçün ayrılmış vəsaitə belə göz dikirlər. Ümid edirik ki, lazımi qurumlar Ağsu rayonu Əhalinin Sosial Müdafiəsi Mərkəzində yaşananlarla bağlı ölçü götürəcək.

Qarşı tərəfin münasibətini dərc etməyə hazırıq.