Ayrı-ayrı ünvanlarda nəqliyyat vasitələrinin hissə-hissə satılması, öz-özlüyündə ən böyük cinayət hadisələrindən biri hesab olunur

Gəncə şəhəri, Nizami rayonunun Gəncəvi küçəsində “Göy Məscid”lə üzbəüz həyətdə, yol-nəqliyyat hadisələrində və digər səbəblər üzündən yarasız hala düşmüş, yaxud da istifadə müddəti başa çatmış avtomobillərin hissə-hissə satılması haqda, yəqin ki, əksəriyyət məlumatlıdır. Düzdür, atılan belə bir addımların qanunsuz, cinayət hadisəsi olmasını Səyyar adlı şəxs dərk etsə də, təəssüflər olsun ki, o, bu gün də qol qoyduğu əməllərindən əl çəkmir ki, çəkmir. Çünki, bu haqda məlumatları informasiya mərkəzimizə çatdıran mənbə bildirir ki, Səyyar adlı şəxsin bu cür cinayət əməllərə qol qoymasının kökündə, onun daha çox hüquq-mühafizə orqanı əməkdaşları ilə qurduğu işbirliyi durur.

Diqqəti bir məqama da yönəldək ki, əslində yarasız hala salınmış, yaxud da istifadə müddəti tam başa çatmış nəqliyyat vasitələri, hissə-hissə satılmazdan öncə, onlara məxsus nömrələr təhvil verilməli, aidiyyəti qurumlarda qeydiyyatı da aparılmalıdır. Əgər belə bir addımlar atılmazsa, o halda kim təminat verə bilər ki, qeyd olunan ünvanda, yaxud da ünvanlarda hissə-hissə satılan nəqliyyat vasitələrindən axtarışda olanı, ölümlə nəticələnən hadisələr törədəni, oğurluq yolu ilə ələ keçirilənləri və.s yoxdur. Bir sözlə, belə bir ünvanda, yaxud da ünvanlarda nəqliyyat vasitələrinin hissə-hissə satılması, öz-özlüyündə ən böyük cinayət hadisələrindən biri hesab olunur.

Amma, bütün bunlara məhəl qoymayan və külli miqdarda qazanc əldə etməyi qarşısına məqsəd qoyan Səyyar adlı şəxsin əməllərinə fikir versək onu da görərik ki, əslində o, atdığı addımları ilə neçə-neçə cinayət işlərinin izlərini itirə bilir. Belə bir səbəb üzündən də, onun qanunsuz əməlləri ilə bağlı 30 oktyabr 2015-ci il tarixdə DİN-nin 102 xidmətinə etdiyimiz zəng, heç də lazımi nəticə vermədi. Çünki, qeyd olunan qurumdan Gəncə şəhər Polis İdarəsinin növbətçi hissəsinin verilməsi, növbətçi hissədən isə problemin araşdırılmasına səthi yanaşma, bizi təkrar 102 xidmətinə zəng etmək məcburiyyətində qoydu. Həmin vaxt özünün təhqiqatçı olduğunu bildirən İbrahim Hüseynov isə bildirdi ki, “siz Bakıda olsanız da, gəlib ərizə yazmalısınız” dedikdə, çox götür-qoy etməyə məcbur olduq. Onun da problemin varlığına belə bir yanaşma nümayiş etdirməsi, “sizə məlumat vermişik, gedin araşdırın və bizə də lazımi cavab verin” deməyimiz, deyəsən qarşı tərəfin heç də xoşuna gəlmədi. Sən demə bu xoşa gəlməməyin arxasında, başqa-başqa məqamlar, kimlərinsə maddi təminatlarının ödənilməsi dururmuş. Çünki, əməkdaşımız ilk əvvəl Səyyar adlı şəxslə əlaqə saxladıqda, “mən hər ay polisə də, icra qurumlarına da və digər vəzifə sahiblərinə də “haqq-hesab” çatdırıram” deməsi, atılan addımın, bəslənilən yanaşmanın səbəblərini müəyyən etməyə tam əsaslar verir.