Goranboyun Xınnalı kənd sakinləri uzun müddətdir elektrik enerjisinin verilişindəki problemlərdən şikayətçidirlər. Onlar qəzalı vəziyyətdə olan elektrik dayaqları və xətlərinin yenilənəcəyi günü gözləyirlər.

Sabah burda bir adamı cərəyan vursa, buna kim cavab verəcək? İcra Hakimiyyəti, İşıq İdarəsi, yoxsa sakinlər?..

Bu sual artıq uzun müddətdir ki, Xınnalı sakinlərini narahat edir. Kəndin təxminən 100-ə yaxın evini əhatə edən və bərbad vəziyyətdə olan elektrik təsərrüfatı sakinlərin həyatı üçün əsl təhlükə mənbəyidir. İşıq dirəkləri olduqca etibarsız, naqillər isə istismara yararsızdır.

Elza Verdiyeva- sakin: "Uşaqları az qala bir neçə dəfə cərəyan vura. Naqillə sallanır, dayaqlar pis gündədir. Vaxtı-vaxtında işıq pulunu ödəsək də, şikayətimizə baxan yoxdur".

Səlmi İsmayılova- sakin: "İki azyaşlı uşaqğım var. Onlar məktəbə gedəndə arxalarınca baxıram ki, naqil qırılıb başlarına düşməsin. Heç kim də gəlib bununla maraqlanmır".

Qurban Hüseynov- sakin: "Bizim evimizin qarşısına maşın keçmir. Taxta ilə naqilləri qaldırdıqdan sonra maşın keçir. Çox pis vəziyyətdədir, uşaq üçün, böyük üçün təhlükəlidir".

Lüdmila Verdiyeva- sakin: "Mənim evimin yanındakı dayaq az qala yıxılır. O da düz pəyənin yanındadır, yanğın olası olsa evim də yanacaq. Nə qədər desək də nəticə yoxdur".

Məsələyə münasibət bildirən Goranboy Rayon Paylayıcı Elektrik Şəbəkəsindən bildirilib ki, Xınnalı kəndi ilə yanaşı, rayonun bir neçə kəndinin də enerji təchizatında çatışmazlıqlar var. Problemin aradan qaldırılması üçün qurum tərəfindən həmin yaşayış massivlərində elektrik naqillərinin və dayaqların dəyişdirilməsi prosesi mərhələli şəkildə həyata keçirilir.

http://kepeztv.az/