Gəncədə Təbriz, Təbrizdə Gəncə günlərinin təşkili, hər iki şəhərdə istehsal olunan məhsulların sərgisi, müxtəlif sahələri əhatə edən əməkdaşlıq bu gün Gəncədə İranın Şərqi Azərbaycan Vilayətinin valisi ilə müzakirə edilib. İki ölkə arasında münasibətlərin regional əməkdaşlıq çərçivəsində davam etdirilməsinin xalqlar arasında daha mehriban münasibətlərin qurulmasına təkan verəcəyinə əminlik ifadə edilib.

Gəncə ilə İranın şərqi Azərbaycan vilayəti arasında əlaqələr bu ilin fevral ayından qurulub. Vilayətin inzibati mərkəzi olan Təbrizlə Gəncənin qardaşlaşmasının davamı olaraq bu dəfə İran nümayəndələri Nizami yurdundadırlar. Tarixən hər 2 şəhər arasında mövcud olan münasibətləri yeni müstəviyə qaldıran qarşılıqlı səfərlər müxtəlif sahələri əhatə edən əməkdaşlığın dərinləşməsinə xidmət edir.

İsmayıl Cabbarzadə -İranın Şərqi Azərbaycan Vilayətinin valisi: "Vali bəylə söhbət etdik. Hansı sahələrdə, neçə əməkdaşlıq edə biləcəyimiz haqda müzakirələr apardıq. Təhsil, səhiyyə, kənd təsərrüfatı sahələrində əməkdaşlıqların qurulmasını, elmi konfransların keçirilməsini, iki qardaş şəhər arasında mövcud olan əlaqələrin daha da genişləndirilməsini arzu edirik".

Gəncə şəhər İcra Hakimiyyətində baş tutan qəbulda Gəncə ilə Təbriz Dövlət universitetləri, kənd təsərrüfatı və səhiyyə sahəsində iki şəhər arasında əlaqələrin qurulması müzakirə edilib. Qarşılıqlı olaraq satış-sərgilərin və mədəniyyət günlərinin təşkili ilə bağlı danışıqlar aparılıb, iqtisadi sferda əməkdaşlığın prespektivlərindən danışılıb.
Elmar Vəliyev- Gəncə şəhər İcra Hakimiyyətinin başçısı: "İki qardaş şəhər arasında əlaqələrimiz daha da genişlənəcək. Bundan sonra sərgilərin keçirilməsinə daha çox üstünlük veriləcək. Təbriz mahalında istehsal olunan məhsulların Gəncədə sərgilənməsi, burada expo mərkəzin tikintisi və mütəmadi fəaliyyəti ilə əlaqədar razılıq əldə etdik. Bu da aramızda olan əlaqələrin daha da inkişaf etməsinə və qardaş qapıların daha da yaxınlaşmasına təkan verəcək".

Nizami yurdunu Şəhriyarın uyuduğu şəhərlə bağlayan amillərdən biri də Gəncədə Təbriz küçəsinin olmasıdır. 2.5 km uzunluğunda olan küçədə Təbrizi simvolizə edən lövhənin açılışını edən qonaqlar dünyanın 5 ən böyük parkı sırasında yer alan Heydər Əliyev park-kompleksində yaradılan şəraitlə tanış olub, ulu öndərin adını daşıyan mərkəzin xatirə kitabına ürək sözlərini yazıblar. Nümayəndə heyətinə Azərbaycanın Təbrizdəki baş konsulu Əli Əlizadə də daxil olan İranlı nümayəndə heyəti 2 gün ərzində Gəncənin dini, tarixi yerləri, təhsil və sənaye müəssisələri ilə tanış olacaq.

1500-lik sənaye zonası yaradılacaq, orada 2017-ci ilədək 3-4 zavod tikiləcək, 6 min nəfər işlə təmin olunacaq. Təbriz Universiteti ilə Gəncə Dövlət Universiteti, Təbriz Tibb Universiteti ilə Gəncə xəstəxanaları, kənd təsərrüfatı sahəsində isə ADAU ilə əməkdaşlıq qurulacaq.

http://kepeztv.az/