Göyçay şəhərində və bir neçə kənddə güclü yağış nəticəsində evləri su basıb.


APA-nın yerli bürosunun xəbərinə görə, ötən axşamdan bu gün səhərədək yağan və güclü küləklə müşayiət olunan leysan yağışı nəticəsində yaranan sel suları Göyçay şəhərində və kəndlərdə 15-ə yaxın evin zirzəmisinə dolub. Şəhərin şimalındakı fərdi həyətyanı sahələri, həyət evlərini, tövlələri, yardımçı tikililəri, eləcə də 16 mənzillik yaşayış binasını, Qarabaqqal, Ərəbcəbirli, Qarayazı, Şahsoltanlı və Yekəxana kəndlərində dağətəyi ərazidə yerləşən evləri su basıb. Su arxları dolub daşaraq kənardakı evlərə, əkin sahələrinə ziyan vurub, həyətləri lil qatı örtüb.

Şəhərin şimalındakı Arvançay çayı daşıb, küçələrdə keçilməz lil qatı yaranıb. Sel 40-a yaxın toyuq və cücəni tələf edib, minik avtomobillərinin içinə su dolub. Sakinlərin sözlərinə görə, gecə səhərədək həyətlərdən bir metr hündürlüyündə sel suları axıb. Şəhərin şimalındakı 16 mənzillik yaşayış binasının sakinləri sel və lil qatına görə uşaqları evdən bayıra çıxara bilmədiklərindən məktəbə göndərməyiblər. Hazırda rayonda leysan yağışı davam edir.
Həmçinin, güclü külək səbəbindən bəzi yerlərdə ağaclar qırılaraq elektrik naqillərinin üzərinə düşüb, rayonunun 40-a yaxın kəndinə, eləcə də şəhərin bir çox hissəsinə gecə saatlarında enerji verilişi dayanıb.
Rayon Fövqəladə Hallar Komissiyasından APA-ya bildirilib ki, hazırda müraciətlərə baxılır, dəyən ziyanın aradan qaldırılması istiqamətində tədbirlər görülür.