Beynəlxalq və Azərbaycan Stolüstü Tennis Federasiyasının, həmçinin Avropa Stolüstü Tennis Birliyinin birgə layihəsinə əsasında yerli hakimlər üçün sertifikatlaşdırılmış seminar keçirilib. Bakıda baş tutan təlimlərdə regiondan olan hakim və məşqçilər də iştirak edib.

Sentyabrın 21-dən 25-dək davam edən seminar Avropa Stolüstü Tennis Birliyinin rəsmiləri tərəfindən aparılıb. 20 hakim və məşqçinin dəvət aldığı təlimlərdə Gəncədən Əhməd Hüseynov iştirak edib. Seminara qatılanlar həm nəzəri, həm də praktiki yöndən təlimatlanıb.

Əhməd Hüseynov -məşqçi: "Bir sıra tədbirlər keçirilir ki, stolüstü tennis inkişaf etsin. Bununla bağlı müxtəlif ölkələrdə seminarlar təşkil olunur, həmin seminar məşqçilər dəvət edilir. Bu da stolüstü tennisə göstərilən diqqətdən irəli gəlir".

Stolüstü tennis geniş çevrədə populyarlığa malik olmasa da, Nizami yurdunda bu idman növünün ənənələri var. Hazırda stolüstü tennis Gəncədə bir idman və bir orta məktəbdə tədris olunur.

Əhməd Hüseynov -məşqçi: "Gəncədə 3-4 ildir ki, bu idman növü digər bölgələrə nisbətən yaxşı vəziyyətdədir. Çünki son illər yeniyetmələrin respublika oyunlarında Gəncənin oğlanlardan və qızlardan ibarət komandası daima ilk dördlükdə yer alır. Gəncə komandaları ilə bərabər səviyyədə mübarizə aparır".

Qeyd edək ki, son bir neçə ildə Gəncədə məktəblilərin spartakiadasının proqramından çıxarılan stolüstü tennis bu il yenidən yarışların təqvim planına salınıb.

http://kepeztv.az