Demək olar ki, kompleksdə işlərin 90% - dan çoxu yekunlaşıb. Kompleksin əsaslı təmirinə 2010-cu ildən başlanılıb. Kompleksin yerləşdiyi 2.5 hektar ərazidə 36 kiçik və 5 böyük günbəzdən ibarət məscid, 1000 nəfərlik ehsangah, 200 kv.m ərazisi olan qurbangah, 500 avtomobillik 2 dayanacaq və mehmanxana inşa edilib. İki zaldan ibarət namazgahda nəfis xəttatlıq işləri görülüb. Hüseyniyyə və Zeynəbiyyə adlanan hər birinin 200 nəfər tutumu olan zallarda işlər başa çatıb.
Ziyarətgahın üstündə 28 metr hündürlüyündə kümbəz, tikilinin sağ və sol hissəsində 2 minarə, kompleksin həyətində isə mehmanxana tikilib. Binaların üzlənməsi və daxili interyerdə bəzək işləri aparılıb. Minarələrin üzlənməsi işi davam etdirilir. Ərazidə müasir işıqlandırma sistemi qurulub, 10 min kv.metrdən çox asfalt örtüyü salınıb. Tikilinin həyəti kərpiclə hasara alınıb. 600 kv.metrlik ərazidə əsas giriş xüsusi layihə ilə hazırlanıb. Piyadaların rahat hərəkəti üçün səki daşları düzülüb. Hazırda kompleksin hasarları kərpic elementləri ilə bəzədilir. Kompleksin ətrafında yaşıllıq zolaqları salınır.

http://www.ganjanews.az