Mövzunun başlanğıcını oxuyan hər kəsə, başlığın belə qoyulması bəlkə də təəccüblü gələr

“Görəsən bu tuthatut nədir ki,” başlıq belə qoyulub deyə, bəlkə də öz-özünə bir sual edilən də tapılar. Amma, Yevlax-Bərdə “post”unun təqribən 20-30 metrliyində dayanıb olan-keçənlərə nəzər saldıqda, o zaman bəlli olur ki, bu tuthatutun tamam başqa bir qaydaları, tətbiq olunan “incəliklər”i var. Yəni, digər “post”lardan fərqli olaraq, Yevlax-Bərdə “post”unda tutuldun, demək yol polisi əməkdaşlarının əllərindən qurtulmağın özü müşkül bir məsələdir. Xüsusilə də, “Kamaz” markalı nəqliyyat vasitələrinin baş leytenant Sədi Calalovun “tuthatut burulğanı”na düşməsi, sanki ölümə bərabər bir işdir.

Baş verənlər haqda bir neçə sürücülərin, xüsusilə də əslən Qarabağdan olan Kamaz “şofer”lərinin danışdıqlarını dinlədikcə, o zaman bəlli olur ki, Yevlax-Bərdə “postu”nda əməlli-başlıca regional amil qabardılır. Buna əsas səbəb o olur ki, “post”a sahiblik edənlərin tam əksəriyyətinin Qərbi Azərbaycandan, bir qədər də dəqiq desək eyni kənddən olmalarıdır. “Post”da yaşananlar barədə informasiya mərkəzimizi məlumatlandıran mənbənin və bir neçə sürücülərin danışıqları bizim üçün maraq kəsb etdiyindən, problemlərin varlığına bir qədər toxunduq. Amma belə bir qənaətə də gəldik ki, yol polisi əməkdaşları tərəfindən regional amil qabardılırsa, xüsusilə əslən Qarabağ zonasından olan sürücülər saxlanıb hansısa formada incidilirsə, belə bir addımın atılması heç cür yolverilməzdir. Yəqin ki, BDYPİ-nin rəhbərliyi problemlərin varlığı ilə məlumat əldə etdikdən sonra, yaşanan olayların mahiyyətini diqqətdə saxlayıb, lazımi addımlarını da atacaq.

Açıqlamada qeyd olunanlarla bağlı, qarşı tərəfin də mövqeyini öyrənməyə hazırıq.