Vətəndaşların təklif, müraciət və şikayətlərinə baxılması, onların ehtiyaclarının mümkün şəkildə təmin edilməsi məqsədi ilə qəbulda keçirilən görüşdə 90 nəfərə yaxın şəhər sakini iştirak edib. Regionsesi.az saytının Ganjanews-ə istinadən verdiyi məlumata görə şəhərin idarə, təşkilat və müəssisə, o cümlədən hüquq mühafizə strukturlarının rəhbərləri də qəbulda iştirak edib.
Qəbulda işsiz vətəndaşların işlə təmin olunması, Qarabağ müharibəsi əlilləri və veteranlarının mənzil və ya torpaq sahəsi ilə təminatı məsələsi önə çəkilib. Görüşdə müraciətlər arasında məşğulluğun təmin edilməsi, sahibkarlıq fəaliyyətinə dəstək verilməsi xahiş olunub.
Yığıncaqda səsləndirilən problemlərin bir çoxu yerində həllini tapıb. Elmar Vəliyev səsləndirilən məsələlərlə bağlı aidiyyatı qurumlara ciddi tapşırıqlarını verib. Digər problemlər isə aidiyyatı şəxslər tərəfindən nəzarətə götürülüb.
Elmar Vəliyev bildirib ki, bu qəbildən olan görüşlərin əsas məqsədi, ölkə başçısının tapşırığına müvafiq olaraq vətəndaşların firavanlığının təminatı, həyat səviyyəsinin yaxşılaşdırılmasıdır. Şikayətlər daha çox sosial sahə ilə bağlı olur. İcra başçısı şəhər sakinlərinin problemlərinin həlli istiqamətində lazımi addımların hər zaman atılacağına diqqət çəkib.
İcra başçısı jurnalistlərin suallarını cavablandırarkən bildirib ki, Gəncə şəhərində 800-dən çox binanın yararsız vəziyyətdə olan dam örtüyü əsaslı şəkildə yenidən qurulub. Küçə işıqlandırılması üçün 15.000-dən çox müasir tipli küçə işıqlandırma dirəyi quraşdırılıb. Gəncənin yenidən qurulması, yeni salınan qəsəbələrin və yaşayış massivlərinin yeni görkəm alması istiqamətində işlər bundan sonra da davam etdiriləcək.



Regionsesi.az