Sözügedən şəxs rayondakı kanal və su arxlarını satmağa başlayıb, əhali arasında isə narazılıq getdikcə daha da artır

Bir neçə gündür intihar olayları ilə diqqət mərkəzinə gəlmiş İmişlinin icra başçısı Vilyam Hacıyevin adı daha bir qalmaqallı məsələyə qarışıb. JAM.AZ xəbər verir ki, rayonda satmadığı torpaq sahəsi qoymayan icra başçısı, indi də su arxları və kanalların satışına start verib.

Məlumatda deyilir ki, qanunla su hövzələri dövlətin himayəsindədir və onun satılması və ya özəlləşdirilməsi qadağandır. Amma Vilyam Hacıyev üçün qanun topuqdan aşağı olduğu üçün bunun heç bir əhəmiyyəti yoxdur. Elə ona görədir ki, icra başçısı satdığı su arxları və kanalları üçün hətta sənəd də vəd edir.

Azerinfo.az-ın JAM.AZ-a istinadən yaydığı məlumata görə, İmişlidə durum xeyli gərginləşib. Rayondakı sosial və iqtisadi vəziyyətin ağırlığından bezən insanların etirazlara başlaması an məsələsi hesab edilir. İddia olunur ki, rayonda durum o qədər ağırdır ki, hər an hər şeyin baş verə bilməsi ehtimalı böyükdür.

Qeyd edilir ki, camaat hətta Vmilyam Hacıyevə torpaq və su hövzələrini satması səbəbindən ona ayama da qoşublar. «Lyotçik Vilyam» adı verilən icra başçısının bu ada «layiq» görülməsinə səbəb isə onun yer üzündə torpaq sahəsi qoymadığı və yaxın vaxtlarda göydə «torpaq alveri»nə başlayacağı lətifəsidir.

Qarşı tərəfin də mövqeyini dərc etməyə hazırıq.