Geridə qoyduğumuz 2014-cü ili ölkəmizin ikinci böyük şəhəri olan Gəncə tarixində yaddaqalan hesab etmək olar. Bu il Gəncədə həyata keçirilirən böyük layihələr, yeni açılan, və ya təməli qoyulan müəssisələr şəhərin inkişafını şərtləndirir.

Bu il Gəncədə 7 məktəb əsaslı təmir və yenidənqurmadan sonra istifadəyə verilib. Ölkə başçısının Gəncəyə səfəri zamanı 4 nömrəli tam orta məktəbin 960 şagird yerlik yeni korpusunun, 2 nömrəli körpələr evi-uşaq bağçasının açılışı 2014-cü ili həmin təhsil ocaqlarının tarixinə yazdı. Prezident İlham Əliyevin Gəncəyə ikinci səfəri çərçivəsində Gəncə Dövlət Dram Teatrının yeni binasının təməlinin qoyulması, Vaqon istehsalı zavodunun inşasına başlanması da geridə qoyduğumuz ilə təsadüf etdi. Hazırda Gəncə Dövlət Filarmoniyasında tikinti işləri davam edir, İmamzadə Kompleksinin tikintisilə bağlı isə işlərin 80%-i həyata keçirilib, son tamamlanma işləri aparılır. Bu il Gəncə üçün əlamətdar hadisələrdən biri də ölkə başçısının 21 oktyabr 2014-cü il tarixdə Gəncəylə bağlı imzaladığı sərəncamlar oldu. Şəhərin sosial-iqtisadi inkişafının daha da sürətləndirilməsi məqsədilə Gəncə şəhərinə ölkə Prezidentinin Ehtiyat Fondundan beş milyon manat ayrılıb. Dövlət başçısının digər bir sərəncamı ilə otuz beş min nəfər əhalinin yaşadığı Məhsəti, Sadıllı, Natəvan, Şıxzamanlı, Cavad xan qəsəbələrini Gəncə şəhəri ilə birləşdirən, ümumi uzunluğu 21 kilometr olan avtomobil yollarının tikintisinin davam etdirilməsi üçün dövlət büdcəsindən Gəncəyə beş milyon manat ayrılıb.

kepeztv.az