Alı Alıyev Bahar Muradovanın adından sui-istifadə edərək sakinlərə mənzilləri 5, 10 və 15 min manata satır, etiraz edənlər isə həbs edirlər

Iabırçılığın son həddi yaşanır. JAM.AZ-a müraciət edən rayon sakinlərinin bildirdiyinə görə, icra başçısı Alı Alıyev hələ aprel döyüşləri zamanı cəbhə xəttinə yaxın Bulğa dərəsindəki sürülərini çıxararq, onları Fin şəhərciyi deyilən əraziyə daşımışdı. Onların bildirdiyinə görə, hazırda həmin ərazidə qaçqınlar üçün evlər tikilir.
Alı Alıyev hazırda Fin şəhərciyində inşa edilən mənzilləri satmaqla məşğuldur. Onlar bildirirlər ki, Qaçqınkomun sədri Əli Həsənovun rayona gəlib-getməsindən sonra bu alver daha şıdırğı şəkil alıb. “Bu ərazidə yaşayanlara deyil, kənardan gələnlərə ev satılır. Satış işini isə Alı Alıyevin qəsəbə üzrə nümayəndəsi, həmçinin qohumu, eyni zamanda icra nümayəndəsi işləyən Şahlar müəllim həyata keçiri. Şahlar müəllim ona müraciət edənlərdən pul alaraq, adlarını siyahıya yazır”.
Füzuli sakinləri deyir ki, baş verənlər artıq ciddi narazılığıa çevrilib. Onların bildirdiyinə görə, Fin Şəhərciyi deyilən ərazidə yaşayan rayon sakinləri artıq bir neçə dəfə aksiya keçirərək, Bakı-Horadiz magistral yolunu bağlayıblar. “Lakin bir neçə dəfə aksiyaların qarşısı alınıb. Amma analoji hadisə Beyləqanda yaşanmışdı, ora Alıyevin əli açtmadığından onlar aksiyalarını keçirib, Beyləqan-Daşburun yolunu bağlamışdılar. Səbəb təkdir: evlər satılır”.
Həmin ərazidəki evlərin hər birinin öz qiyməti var. “Qaçqınkomun sədri gəlib, getdikdən sonra qiymətlər kəllə-çarxa qalxıb. Hazırda ikiotaqlı mənzilin qiyməti 5000 manatdır. Çox otaqlı mənzillər üçün isə 10-15 min manat tələb olunur. Pullar Şahlar müəllimin əliylə yığılıb, Alı Alıyevə ötürülür”.
Sakinlər deyirlər ki, Alı Alıyev işə deputat Bahar Muradovanın da adını qarışdırıb. Belə ki, guya, vitse-spiker Bahar Muradova “Qaçqınkom” sədri Əli Həsənova deyir, o da Füzulinin icra başçısı Alı Alıyevə tapşırır. Yekun işləri isə Şahlar müəllim həyata keçiri. “İcra başçısının müavinləri də yaddan çıxarılmayıb. Onlara ya pul verilir, ya da qohumlarına ev hədiyyə olunur”.
Şikayətçilər vurğulayırlar ki, narazılıq artıq pik həddədir. Çünki analoji proseslər Zobucuq və Qayıdış şəhərciklərində də yaşanmışdı. “İndinin özündə də evlərdə yaşamaması bəhanəsi ilə insanları evlərindən çıxarıb 5000, 10000, 15000 manata başqalarına satırlar. Əgər baxılsa yeni ev alan insanlar heç burada yaşamır. Əgər bu qəsəbələr yoxlanılarsa, məlum olar ki, orada evlər birinin adınadır, içərisində yaşayanlar isə başqa insanlardır. Yenə də bu işləri Alı müəllimin rəhbərliyi altında qəsəbə icra nümayəndələri həyata keçirir”.
Etiraz edənlərlə də bağlı tədbir görülüb. Bu zaman Su və Meliorasiya Təsərrüfatı QSC-nin rəhbəri Əhməd Əhmədzadənin bacısının kürəkəni olan Füzuli Polis Şöbəsinin rəisi önə verilir. “Şikayət edən, etirazçı varsa onu ya başqa partiyanın üzü olması, ya da təxribatçılıq etdiyinə görə saxlayırlar. Bəzilərinə isə xəbərdarlıq edirlər ki, əgər səsini çıxararsa, cibindən narkotik çıxacaq”.
Füzuli camaatı Prezident İlham Əliyevə müraciət edərək, onlara köməklik göstərməsini xahiş edirlər.
Qarşı tərəfi də dinləməyə hazırıq.