Daşkəsənin Xoşbulaq kəndi təmiz havası, saf bulaqları və sıx meşələri ilə tanınır. Amma üçüncü amil getdikcə sıradan çıxır. Kənddə təbii qazın yoxluğu səbəbindən sakinlər ağacları kəsərək yanacaq kimi istifadə edirlər. “Azəriqaz” rəsmiləri isə onları bir az da səbrli olmağa çağırır.

Təxminən 5 il əvvəl Xoşbulaq kəndinə qaz xətti çəkiləndə hamı tezliklə mavi yanacaqdan istifadə edəcəklərinə böyük ümid bəsləyirdi. Ancaq aradan xeyli müddət keçməsinə baxmayaraq, bu ümidlər özünü doğrultmayıb. Sakinlər hələ də təbii qazın həsrəti ilə yaşayırlar.

Baxmayaraq ki, Xoşbulaq kəndində qazpaylayıcı stansiyadan daşıyıcı xəttin çəkilişi başa çatdırılıb. Məhəllədaxili xətlər isə qismən çəkilsə də, sonradan işlər yarımçıq dayandırılıb.
Saleh Qurbanov- sakin: “Təəssüf ki, 90 ev qaz istifadə etmək üçün nəzərdə tutulmuşdur, onlar da yararlana bilmirlər. Ümumiyyətlə kəndin özünə də qaz xətti çəkilib. Ancaq evlərə paylanma işi başa çatmır. İldən-ilə bu gecikdirilir”.

Buna görə də sərt iqlimə malik kənddə sakinlər qızınmaq üçün meşələrə üz tuturlar və bununla da ətraf mühitə ziyan vurmaq məcburiyyətində qalırlar.
Xoşbulaq bağlarında meyvə ağaclarının sayı da azalır. Səbəb isə yenə də eynidir. Əlacsız qalan sakinlər meyvə ağaclarını kəsərək odun sobasında yandırırlar.
Sakinlər kəndin qazlaşdırılacağına inamlarını itiriblər. Çünki illər əvvəl çəkilən qaz xətləri artıq korroziyaya uğrayıb, sayğaclar isə işlənmədən istismar müddətini başa vurub.
Fəridə Quliyeva- sakin: “Heç vaxt qazdan istifadə etməmişik. Zülm çəkirik, əziyyət çəkirik. Pulumuz olmayanda odun ala bilmirik, soyuqda qalırıq”.
Kəmalə Musayeva- sakin: “Uzun illərdir odun sobasından istifadə edirik. Odunun isə maşınını 250 manata alırıq. Qışı həmin odunla yola veririk”.
Şəmkir Regional Qaz İstismar İdarəsinin rəsmiləri isə Xoşbulaq kəndinin tezliklə qazlaşdırılacağını vəd edirlər. İdarənin baş mühəndisi Məzahir Hüseynovun sözlərinə görə, kəndin qazla təchizatında yeganə problem əksər mənzillərdə yaşayış olmamasıdır.
Məzahir Hüseynov- Şəmkir Regional Qaz İstismar İdarəsinin baş mühəndisi: “Layihə-smeta sənədlərinə uyğun olaraq, daşıyıcı və qaz xətləri inşa olunub. Həmin ərazidə mənzillərin qaz xətləri də çəkilib, sayğaclar da quraşdırılıb. Ancaq evlər mövsümi xarakter daşıdığından bəzi abonentlər evdə olmur. Ona görə də işlərimizi tamamlaya bilmirik. Ancaq buna baxmayaraq, ilin sonunadək Xoşbulaq kəndi tam qazlaşacaq”.
Xoşbulaqda 2 mindən çox ailə yaşayır. Onlardan 600-ü daimi olaraq kənddə qalır.

kepeztv/az