Düşmənlə Tərtər istiqamətində gedən döyüşlərdə qəhrəmancasına həlak olan Azərbaycan ordusunun zabiti İnqilab Quliyev bu gün Gəncədəki şəhidlər xiyabanında torpağa dəfn olunub. Şəhid zabitimiz son mənzilə minlərlə insanın alqışları ilə yola salınıb.

Əslən Kəlbəcərdən olan və Gəncədə müvəqqəti yaşayan 33 yaşlı silahlı qüvvələrin zabiti İnqilab Quliyev aprelin 4-ü Tərtər istiqamətində düşmən hücumunu dəf edərkən şəhid olub. Gəncə Şəhər İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin nümayəndələri, döyüş yoldaşları və minlərlə şəhər sakini şəhidi son mənzilə təntənə ilə yola salıb. Böyük izdiham yaşanan mərasimdə şəhid İnqilab Quliyevin əsl vətənpərvər, qorxmaz, cəsur və yüksək nizam intizamılı bir zabit kimi daim yaddaşlarda yaşayacağı vurğulanıb.

Çingiz Quliyev- şəhidin atası: “Sərkərdə İnqilabın ölümü ilə onlar heç nəyə nail ola bilməzlər. Çünki İnqilab kimi oğullar Azərbaycanda minlərlədi. Mən inanıram ki, torpaqlarımız azad olunacaq. Biz doğma Kəlbəcərə qayıdacağıq. Yalnız o zaman şəhidlərimizin ruhu eyni zamanda oğlumun ruhu şad olacaq. Biz prezidentimizin ətrafında daha sıx birləşməliyik. Mən prezidentimizlə fəxr edirəm”.

Nofəl Quliyev- şəhidin əmisi: “Bir əmi kimi mən deyə bilərəm ki, öz istədiyi bir nailiyyəti şəhidlik zirvəsini əldə elədi. Onun öz arzusu var idi. Kəlbəcərdə anadan olmuşdur. Və istəyi də Kəlbəcəri azad etmək idi. O gün olsun Kəlbəcəri azad edək, onun da ruhu şad olsun”.

Şəhid İnqilab Quliyev Azərbaycan Respublikasının himninin sədaları altında torpağa tapşırılıb. Şəhidin xatirəsinə yayılım atəşi açılıb, dövlət bayrağı yaxınlarına təqdim olunub.

kepeztv.az