“Reynaldo oynamayacaq”.

“Qarabağ”ın baş məşqçisi Qurban Qurbanov Avropa Liqasının qrup mərhələsi çərçivəsində İtaliya “İnter”inə qarşı oyun öncəsi fikirlərini açıqlayıb.

Azerinfo.az azerisport.az-a istinadən xəbər verir ki, o, bu gün baş tutan mətbuat konfransında öncə bunları söyləyib:

- Planlarımızda dəyişikliklər var. Komanda mətbuat konfransından sonra məşq etməyəcək. Uşaqlar "Neftçi" ilə oyunda çox güc itiriblər. Başqa meydanda məşq etmişik. Komanda sadəcə, stadiondakı atmosferlə tanış olacaq.

- “İnter”lə oyundan nə gözləyirsiz?

- Bizi çətin və vacib oyun gözləyir. Hər şeyi düzgün etməyə çalışırıq. Bütün komanda bu oyunun məsuliyyətini dərk edir. Çox istərdik ki, sabah azarkeşlər stadionu yaxşı əhval-ruhiyyədə tərk etsinlər. Hər şeydən çox evdə məğlub olmaq istəmirik. Güclü rəqibə qarşı oynayacağıq. Oyuna tam hazırıq. Rəqib Roberto Mançininin gəlişindən sonra dəyişilib. Bu üzdən ola bilər ki, onlar sabah tam fərqli taktika ilə meydana çıxa bilərlər ki, bu da bizim üçün pisdi.

- Bədavi Hüseynovla Reynaldo oynayacaq?

- Reynaldo oynamayacaq. Bədavi isə bu gün məşq etdi. Amma onun da oynayacağı tam dəqiq deyil. Hər şeyə sabah aydınlıq gələcək.

- Rəqib heç də əsas heyətlə gəlməyib. Bu, işinizi asanlaşdırır?

- Bu, əksinə futbolçularımıza mane ola bilər. Əminəm ki, rəqibin meydana çıxacaq hər bir futbolçusu yaranan şansdan maksimum yararlanmağa, özünü yaxşı tərəfdən göstərməyə çalışacaq. Biz bu barədə düşünməməyə çalışırıq. “İnter” əsas heyətlə oynasaydı, daha yaxşı olardı. Çünki həmin futbolçuları tanıyırıq. Bu oyuna maksimum köklənmək üçün rəqibin heyəti barədə düşünmürük.

- “Qarabağ”ın sabah tarixinin ən mühüm oyununa çıxacağını demək olar?

- Əvvəlki oyunlarımıza baxanda, belə demək olar. Amma qrup mərhələsindəki hər bir rəqiblə oyun bizim üçün önəmlidi. Bu oyun isə qarşıya qoyulan hədəfə çatmaq baxımından həlledicidir.

- Qrupdan çıxandan sonra sizdən Avroliqanın qalibi olmağı da tələb edə bilərlər. Buna hazırsınız?

- (gülür) Gəlin qrupdan çıxaq, ondan sonra nə istəsələr, tələb edərlər. Sabah bizə heç-heçə də bəs edə bilər. Amma meydana qələbə üçün çıxacağıq. “İnter” sıradan rəqib deyil. Azərbaycan və İtaliya futbolunu, çempionatını müqayisə etsək, böyük fərqlərin olduğunu görərik. Belə bir rəqiblə heç-heçə bizim üçün qələbəyə bərabər olacaq. Amma bir halda ki, Ukraynadakı oyunda da oxşar nəticə qeydə alınsın.

- Bir qulağınız da “Dnepr” - “Sent-Etyen” oyununda olacaq?

- Hər iki qulağımız burada olacaq (gülür). Ola bilər ki, oyunun sonlarında bu barədə düşünək. Amma tam olaraq öz oyunumuzu düşünməyimizi istərdim.