Təhlükəsizlik qaydalarına riayət olunmaması, məsuliyyətsizlik, yoxsa qismət?.. Bakıda üç nəfərin ölümünə, Samuxda isə 8 nəfərin xəstəxanalıq olmasına bunlardan hansının səbəb olduğu bilinmir. Bilinən tərəf nəticədir. Nəticə isə ürək ağrıdır. Odur ki, qaz sızması, dəm qazı kimi bəlalardan maksimum qorunmaq lazımdır.

Bakıda bir gündə üç nəfər dəm qazından zəhərlənmə diaqnozu ilə xəstəxanaya gətirilib. Səbail rayonunda paytaxt sakini İradə Hacıyeva ağır vəziyyətdə tibb müəssisəslərindən birinə çatdırılıb. Edilən bütün müdaxilələrə baxmayaraq qadının həyatını xilas etmək mümkün olmayıb. Paytaxtın Sabunçu rayonunun Pirşağı qəsəbəsində isə zəhərlənmədən ər və arvad həyatını itirib. Qəsəbə sakini Ağamövsüm Məmmədov və Sevil Məmmədova dəm qazından boğulublar. İlkin ehtimallara görə, onların mənzillərində təhlükəsizlik qaydalarına tam riayət olunmayıb.

Samuxda isə 8 nəfər qaz sızmasından zəhərlənib. Hadisə bu gün saat 15:00 radələrində Nəbiağalı qəsəbəsində baş verib. Zəhərlənən şəxslər Gəncə Şəhər Təcili Tibbi Yardım Xəstəxanasına çatdırılıblar. Müayinə zamanı xəstələrdən 6-nın vəziyyətləri yaxşı olduğu üçün ambulator müalicəyə buraxılıblar. Əmiqızı olan 32 yaşlı Sufiya və 36 yaşlı Aygün Vəliyevaların vəziyyəti isə orta-ağır olduğundan reanimasiya şöbəsinə yerləşdiriliblər.

Faktlarla bağlı araşdırmalara başlanılıb.

http://kepeztv.az/