Daşkəsən rayonunun Bayan kəndində ağır yol qəzası baş verib

Azerinfo.az "Kəpəz TV"yə istinadən xəbər verir ki, “Niva Chevrolet” markalı avtomobilin körpüdən aşması nəticəsində sürücü və sərnişin hadisə yerindəcə keçinib.
Ölümlə nəticələnən yol-nəqliyyat hadisəsi bu gün saat 17:30 radələrində Gəncə-Daşkəsən-Xoşbulaq avtomobil yolunun rayonun Bayan kəndindən keçən hissəsində qeydə alınıb. “Niva Chevrolet” markalı avtomobil sürüşərək körpüdən aşıb. Nəticədə avtomobildə olan DSMF-nin Daşkəsən rayon şöbəsinin müdiri Elvin Haqverdiyev və Rayon Mədəniyyət və Turizm Şöbəsinin müdiri Hacı Məmmədov dünyasını dəyişib. Meyitlər Məhkəmə Tibbi Ekspertiza və Pataloji Anatomiya Birliyinin Gəncə şəhər şöbəsinə aparılıb.

Hadisə şahidi: “Sürətlə gəlirdi, saxlaya bilmədi düşdü. Çığır-bağır saldıq, çıxardılar”.

Hadisə şahidi: “Səsə gəldik. Maşının körpüdən düşdüyünü gördük. Biri yerində keçinmişdi, bir nəfər isə sağ idi. Yolda dünyasını dəyişdi”.

Faktla bağlı araşdırmalara başlanılıb.